انا عندي تجربة ف موضوع الكتابة،من معاناه ف الكتابه الي كتابة تعجب المعلم وكان بيطلب مني أقرأها لباقي الطلاب، اي حاجه بتتعلمها جديد بتمر بمرحلة تقليد الأول ثم الإبداع.. عشان يحصل عندك المرحله الأولى من رأيي انك تركز ع كاتب واحد فتقدر تقلده، انا ركزت زمان علي مؤلفات د. نبيل فاروق اسلوبه رائع جدا هيخليك تتحمس للقراءة والمزيد من القراءة وهينمي عندك الخيال وده مطلوب جدا للمرحله اللي بعدها وهي الابداع
الخطوات العملية
1-اقرأ كتييييير روايات ملف المستقبل ورجل المستحيل لنبيل فاروق
2-اي جملة تعجبك سجلها ف دفتر خاص، لو انت بعيد عن دفترك مش ضروري تسجل.. الشاهد انك لا تتحجج ان بره البيت مثلا ودفترك مش معاك خلاص مش هقرأ، لأ اقرأ عادي وسيب التسجيل ع عقلك
3-لو بعد فتره شعرت بالملل من نوع الروايات دي اقرأ للاستاذه خوله التونسية رواياتها بديعة وبعدين ارجع لنبيل فاروق
4- حاول تقرأ اللي انت بتسجله وحاول تكون مستمتع بجمال اللغة، الشعور اللي هتحس به عند قراءة كلمات جميلة تساوي الاستمتاع بمشهد جمالي زي بحر او حديقة
5-حاول تستخدم اللي سجلته ف كتابة يومياتك
6-اما تشرع فعلا في كتابة موضوع، اعمل عصف ذهني لنفسك ، انك تكتب كل وأي فكره او كلمة تيجي ف دماغك، الكلمات والأفكار دي هتكون أمامك وانت بتكتب ف هتلهمك
7-اما تبدأ تكتب ابدأ من اي نقطة، تقدر تكتب من نص الموضوع أو من اخره مش بالضروري تستنفذ وقت طويل عشان تفكر ف المقدمة، بعد ما تكتب نقاط منفصله وصل الموضوع وهتقدر تستخلص مقدمة رائعة من اللي كتبته
8-اسمع كتب صوتية او ناس بتتكلم لغة عربية او مسلسل باللغة العربية مش لهجات
هتتعب الايام الأولى لكن بعد كده هتستمتع جدااااا.. بتقديري الموضوع ممكن ياخد منك ساعة يوميا.. آسفة جدا ع الاطالة