القهوة
مشروب بنشربه يوميا و بنحبه كلنا و أنا منكم
ليه فوائد عظيمة... و ليه أضرار بليغة
(نصيحة: لو القهوة دي قريبتك متكملش البوست (^‿^) )
تعالوا نشوف الموضوع دا مع بعض
القهوة منشط للمخ، تزيد التركيز، بتقلل التفكير المشوش
مضاد أكسدة رهيب لجسمك
و هي كدا كدا دراعك اليمين و انت بتذاكر أو بتشتغل
ولكن
ليها أضرار عميقة في الجسم ومنها:
في حاجة أسمها Adenosine في جسمك... بيعمل ايه؟ دا هو السائل اللي بيفرزه الجسم على مستقبلات معينة في المخ علشان يقوله: خلاص كدا أنا تعبت
لما بتشرب قهوة (كلنا طبعا عارفين إن القهوة فيها كافيين) بييجي الكافيين يسد المستقبلات دي
وبالتالي متحسش انك تعبان من الشغل أو المذاكرة ودا ممكن يكون لأول وهلة يبان حلو... ولكن التعب دا نعمة من عند ربنا علشان نعطي الجسم الراحة اللي محتاجها، دلوقتي الجسم محتاج ياخد قسط من الراحة و لكنه مش عارف انه عايز قسط من الراحة، فبيكمل شغل و لكن بتظهر أعراض على المدى الطويل زي وجع الظهر و المفاصل -مهو انت يا باشا ماديتوش الراحة اللي هو محتاجها- واحد
احنا قلنا ان الكافيين بيسد المستقبلات الخاصة بالأدينوزين... فبيكتشف الجسم انك شليت المستقبلات دي (من ذكاء الجسم) فبيصنع مستقبلات جديدة أكتر... فدلوقتي بدل الكوباية اتنين و تلاتة و أربعة في نفس اليوم علشان تحصل على نفس التأثير (أول خطوات الإدمان) إتنين
حضرتك طول الليل بتبقا نايم... بتتنفس
لما تيجي تصحى الصبح الجسم بيفرز كورتيزول (علشان يدي زوبة زقة) اللي بيستهلك مياه من جسمك وبالتالي بتحتاج تشرب مياه تعويضا عن المياه المفقودة دي
فبدل ما بتشرب مياه بتشرب قهوة... و القهوة بتعمل ايه؟ بتزود الكورتيزول اللي في الجسم وبالتالي بتقل نسبة المياه في جسمك بشكل كبير ــــــــــــــ تلاتة
حضرتك مش ملاحظ انك كل يوم بتشرب قهوة ولو فات يوم من غير قهوة بيبقى يوم صعب جدا وشاق و مبتعرفش تركز؟
مش ملاحظ ان معظم الناس بيشربوا قهوة بداية من 18 سنة أو أقل لحد بعد الـ60 يوميا و بدون انقطاع؟ مش دي حاجة المفروض تثير تساؤلاتك و فضولك؟
مش ملاحظ ان أول يومين في رمضان بيبقوا أصعب يومين لأي حد بيشرب قهوة؟
دا معناه ان دا ادمان... في شيء ما بيتحكم فيك
أربعة
كل دا بيقودنا الى استنتاج واحد بس... اننا لازم نمتنع عن القهوة
طبعا مش بالكلية، القهوة ليها فوائد برضو ولكن مش كل يوم يعني كل فين و فين لما تروق على دماغك كدا بكباية
و كل فين و فين دا يعني شهرين مثلا
أنا كدا خلصت كلامي
بس عندي سؤال.... هل في حاجة بتاكلها أو بتشربها يوميا و متعرفش تستغنى عنها
هشوف اجابتكم في التعليقات
و آسف طبعا على الإطالة
دا في كلام كتير مقولتهوش لسه عايز أقوله
سلام
