السلام عليكم ورحمه الله وبركاته
طبعا انت فاكر انك عارف لوحة الموناليزا و ان الست اللى فى الصورة دى اسمها موناليزا و الموضوع خلص كدا صح ؟ لو كدا يبقى انت لسا متعرفش حاجة. بص معايا بقى يا سيدى عشان هبهرك هههههه
اولا كدا يا معلم كلمة Mona هى كلمة إيطالية معناها (سيدتى) يعنى موناليزا معناها "سيدتى ليزا"
اللوحة دى بلد منشأه هى ايطاليا و اسمها هناك la Joconde
و الدولة المالكة لها دلوقتى هى فرنسا و اسمها هناك la Gioconda
و الاسمين دول فيهم إشارة لاسم زوجها "جوكوندو"
طبعا هى للرسام ليوناردو دافنشي اللى رسمها فى ايطاليا و مخلصهاش و لا سلمها لأصحابها و اخدها معاه لما سافر على فرنسا .
زمانك بتقول دلوقتى أيوة بردو فين الجديد ؟؟
اصبر عليا هقولك احنا لحد دلوقتي مش عارفين مين الست اللى فى الصورة دى و هل اسمها الحقيقى " ليزا" اصلا و فيه نظريات كتير حولين الموضوع دا ، و دا بسبب أن عمنا دافنشى موقعش على الرسمة و لا كتب عليها تواريخ ، و دا على الرغم من ن اغلب البورتريه أن فى الوقت دا كان بيبقى فيها حاجة تدل على عائلة الشخصية الجالسة أو الحالة الاجتماعية إلا أن مفيش اى حاجة زى دى موجودة فى الموناليزا !!!!
طب خد التقيلة بقى فيه نظرية بتقول أن الموناليزا هى بورتريه ذاتى ليوناردو دافينشي رسمه لنفسه !!!!!!!!!!! و دا الدليل على كلامهم
دى مقارنة بين الصورة اللى رسمها ليوناردو لنفسه و بين لوحة الموناليزا و طبعا الشبه و التطابق واضح جدا !!!!!!!!
هتقولى امال مين " ليزا " دى ؟؟
بص يا سيدى ليزا دى هى زوجة تاجر و مسؤول حكومى احنا شكين أنها هى دى الشخصية اللى فى اللوحة بس بردو مفيش إثبات .
انت عارف سعر اللوحة دى دلوقتى يعادل كام 800 مليون دولار
( انا شكلى هقوم اجيب رسوماتى و انزل على الرصيف أبيعها بعد شوية) هههههههه
عشان ايه كل دا ؟؟ دا احنا حتى مش عارفين مين اللى فى اللوحة اصلا ، و مع ذلك تعد الموناليزا اليوم تقريبا اشهر عمل فنى فى العالم !!!!!
المفروض يبقى فيه سؤال فى دماغك دلوقتى هى ليه اللوحة دى مشهورة كدا يعنى الست اللى فى اللوحة دى اللى احنا مش متأكدين هى مين اصلا احتمال انها مرات تاجر عادى يعنى و هى مش فاتنة الجمال يعنى و اللوحة اصلا صغيرة جدا و مش من اجمل اعمال دافنشي أصلا امال ليه الشهرة دى كلها ؟؟؟
الصراحة مننكرش أنه من عجائب اللوحة دى أنها مرسومة بنسب معينة تخليك متقدرش تهرب من نظرة عينيها مهما كانت الزاوية اللى انت واقف فيها !!!!
بس شهرة لوحة الموناليزا مبدأتش فعليا غير لما اللوحة اتسرقت أيوة زى ما بقولك كدا ....
سنة 1911 الناس ماشية فى معرض اللوفر عادى و فجأة لوحة الموناليزا اختفت !!!! و دا شكل مكانها بين باقية اللوحات لما اختفت .
و بعد سنتين اللوحة رجعت تانى و اللى سرقها اتمسك و كان واحد اسمه Vincenzo Peruggia و اتحبس ست شهور ، و بقى بطل قومى فى إيطاليا عشان هما شايفين أنه حاول يسرق اللوحة عشان يرجعها ايطاليا تانى .
و دا عمو اللى سرق اللوحة /
بس كدا يا سيدى و طبعا لما اللوحة اتسرقت عملت ضجة كبيرة مع انها مكانتش مشهورة اصلا فى الوقت دا و بدأت صورها تنزل فى الجرائد والمجلات و تتعرف خصوصا بقى لما رجعوها تانى متحف اللوفر طبعا الناس كلها كانت عايزة تشوفها و دا اللى خلاها تتعرف .
الموناليزا لما اتسرقت اتعمل منها نسخ كتير عشان تتباع على أساس أنها الصورة الأصل و فيه كلام كتير بيقول أن اللوحة المعروضة فى متحف اللوفر مش هي اللوحة الاصليه اصلا !!!! و دا عرّض اللوحة للخطر كتير عشان كدا هى محفوظة دلوقتى و معروضة خلف لوح زجاجة مقاوم للرصاص فى متحف اللوفر.
ف لو ربنا كرمك فى يوم من الايام و سرقت بنك متنساش تسافر فرنسا و تروح تشوف لوحة الموناليزا هتلاقيها فى متحف اللوفر ، قسم اللوحات الإيطالية ، الغرفة رقم 6 .
و بس كدا يا سيدى يارب تكون المعلومات دى جديدة عليكم و تعجبكم زى ما عجبتنى أنا بعتذر انى طولت بس فعلا لوحة الموناليزا عليها كلام كتير و ضجة و مثيرة جدا للجدل و يمكن هو دا السبب اللى مخليها مشهورة كدا دلوقتى .
الموضوع دا اخد وقت كبير فى تجميعه و كتابته اتمنى انكم متنسوش تشجعونى و لو بكلمة بسيطة لو عجبكم ♥️
و شكرا بجد لأى شخص بيشجعنى ✨
دمتم فى رعاية الله احبتى ♥️