بتعرفوا شو يعني عيد بالنسبة لمغترب ببلاد اجنبية؟...
يعني التعب والهم..
يعني الشغل ليل نهار لاستحضار كل تفاصيل العيد وطقوسو...تفاصيل كبيرة وصغيرة..شي كنا مفكرينو عادي وبديهي..هلق صار حلم..وحلم صعب المنال.
منشتغل اضعاف مضاعفة لحتى نحس ولو كنا عم نكذب عحالنا بأنو الدنيا عيد..
منخبز معمول ..ومنشغل تكبيرات العيد من الموبايل..ومنلبس هالاتياب الجداد ومنقعد...اي وبعدين..!!!!
ولا شي...مناكلن بغصة..ومنغرق تيابنا دموع وقهر.. اصلاً ليش عم نتعب كلهالتعب ومنركض كل هالركض مابعرف؟..
لا حدا رح يدق بابنا..ولا حدا رح يعيدنا..ولا رح يتغير شي.. بالكتير مندق تليفون ومنعايد الاهل متل كل عيد بسنين الغربة العجاف..
لا والنهفة انو لما منصدق عحالنا انا معيدين..وانو الدنيا عيد..ومنلبس هالتياب الي ركضنا ركض لنخليا جاهزة للعيد ومنطلع فين..والعالم كلا بتتطلع فينا بإستغراب..انو خير شبكن!!.. الدنيا عادية والكل رايح عشغلو..دوام ووظيفة ولا كأنو في شي..
فبيتم هالأذان عم يصدح باذنينا النا بس..وبيعنيلنا النا بس.. وبيفرحنا وبيبكينا النا بس..
العيد هو النقطة الي بتجر وراها فيضانات .. اليوم الاكثر وجعاً على قلب كل مغترب..اكتر يوم منغص فيو..واكتر يوم منبكي فيو.. ومنتذكر فيو الماضي..الماضي الي تركناه بالغصب..وبعدنا عنو رغم عن ارادتنا.. العيد هو الغصة..الحرقة.. هو اليوم الي بيضعفنا وبيتعبنا وبيشلّ حركتنا وبيعيق استمرارنا ..و سباحتنا الي ماعم تخلص ومارح تخلص ..وماعم نشوف بر الامان..سباحتنا المضنية بعكس التيار بهالبلاد الغريبة علينا بكلشي..
العيد هو _____ الضربة القاضية ______
ودمتم برعاية الله..❤️
