First time here? Checkout the FAQ!
x

الملاحظات

ليلة القدر في حلب✨❤️(:

في تصنيف اسئله عامه
بواسطة طالب محترف (3.7ألف نقاط)  
+13 تصويتات
632 مشاهدات

ملاحظة:انا مابعرف بالزبط ايمت ليلة القدر بس يلي بعرفو انها بالعشر الأواخر ✨

قراءة ممتعة❤️❤️❤️

بعد هالافطار الفخم والتحلاية المعتبرة..بيتجمعوا اهل الكافيين وبيطالبوا بالقهوة..وراسن الف سيف ما بيتحركوا ليشربوا كل الفنجان ويقرطوا الطحل كمان..حتى يصحصحوا ويقدروا يشوفوا قدامن..بعدا بتقوم النسوان علمطبخ وبتبلش معركة الجلي....طرطقة طناجرة و صحون مطبقة فوق بعضها ..ومي و زوايد اكل هون و هون..ولوووصة مخيفة الها اول ما الها اخر..

( ما علينا خلونا بروحانية رمضانlaugh )..

وقت قصير ومنبلش نسمع اصوات المآذن وهي عم تنشد وتدعي وتأذن لصلاة العشاء ومن بعدها التراويح..

صلاة التراويح بحلب واصوات المؤذنين المشبعة بالطرب الحلبي الاصيل والمقامات التقيلة.. بتعطي نكهة خاصة وساحرة لرمضان ..فالتسميعات بتصدح من المآذن الكتيرة و بتتشابك مع بعضها البعض و بتعطي روحانية عجيبة..

اصوات عذبة وحنونة ومطربة.. بتعشش بالذاكرة و بتشيل الهم عن القلب..وبالأخص بالعشر الاواخر ..لانو الجوامع الحلبية بتتفن بإحياء الليلة الفضيلة..وبتحتار كيف تجذب المصلين لعندها...لانو اغلب الناس بتحجز محلها بالجامع قبل الافطار بشوي من كتر ما الاحياء حلو ومحبب .. 

لانو ليلة القدر بحلب الها خصوصية كتير..وتعتبر من الطقوس السنوية الهامة.. فأغلب الحلبية ان كانوا متدينين ولا معتدلين او حتى بعاد عن الدين ..بيتوحدوا هالليلة العظيمة وبيتسابقوا بإحياءها..و الجوامع على كبرها وكترتها و وساعتها بتتعبى عالاخر وصفوف المصلين بتصل لبرا..وبتنشل معها حركة السير تماماً وبتتوقف السيارات..ومنلاقي المشاة عم ينسابوا من كل حدب وصوب ومعن سجاداتن ومسابحهن وكم اكلة خفيفة ليتقووا فيها طول الليل..وافواج النسوان بتلحقهن بعد ما يأمنوا على الجلي وشغل البيت..

وبيبلش الاحياء وبتتعالى اصوات الناس بالابتهالات والادعية..بأصوات شجية وخاشعه.. وصلاة التراويح بعدها التسابيح وتلاوة القرآن ..بتنسمع بكل وضوح من كل قراني حلب ( اطراف) ..واعداد الناس بتكتر والاقبال بيزيد كل ما تأخر الوقت..وبيتنوع برنامج الاحياء في الجوامع مابين الصلاة والتسبيح والدعاء..وكلو مرتب و منظم ومدوزن ببرنامج مطبوع ومدروس متلو متل اي طقس من الطقوس المتوراثة ..

بتتلبس حلب بهي الليلة الفضيلة بتوب التقى والايمان..ومنستشعر ونحنا ماشيين بالشوراع الخالية من السيارات بشعور حلو كتير..شعور الصراحة صعب اوصفو..مزيج من الشعور بالأمان و الخشوع والفرح السكينة والطمأنينة ..( الي هلق وللاسف الشديد مفتقدينو cryingbroken heart)..

بتمضى هالليلة العظيمة ببطئ حلو كتير.. وبتستمر فيها الابتهالات والصلوات على فرد نفس هيك لتتطلع الشمس..وتتعب هالناس ويخلص برنامج الاحياء وتنتهي معها ليلة القدر الفضيلة..وتنتهي معها طقوس رمضان الكتيرة..و بتبلش طقوس عيد الفطر وتحضيراتو تحل محل المظاهر الرمضانية..

ودمتم برعاية الله....❤️(:

من فضلك سجل دخولك أو قم بتسجيل حساب للإجابة على هذا السؤال

7 إجابة

بواسطة طالب محترف (3.3ألف نقاط)  
+6 تصويتات

مساءك سعيد رجاء بنت حارتي 

ان شاء الله عجيمع العبارة سيوي 

شي كتير محترم 

سلمت ايدي المبدعين :)

بواسطة طالب محترف (3.7ألف نقاط)  
وصباحك اسعد ابن حارتي✨
شكرا كتير ✨
بواسطة طالب محترف (3.7ألف نقاط)  
ابن حاااااارتي
شفتك اونلاين قلت بسلم عليك (:
اخبارك وين هالغيبه لكخاي
تضل بخير
بواسطة طالب محترف (3.3ألف نقاط)  
ولك ميت اهلا وسهلا بنت حارتي الغالية
والله ياخيت متل مابتعرفي شغلتنا الدنيا واحوالها ( فيكي تشغلي موسيقى )
يارب تشوفي كل خير وتضلي بسعادة وراحة بال
سلامات يوب
بواسطة طالب محترف (3.7ألف نقاط)  
ربي يوفقك ابحارتي
خليك عم تبين مو تقطعها
عراسي والله
بواسطة طالب عالمي (6.1ألف نقاط)  
عُدل بواسطة
+4 تصويتات
اعادالله لكم تلك الايام وخيرا منها احزنتيني والله
بواسطة طالب محترف (3.7ألف نقاط)  
امين يارب
شكرا لكَ اخي ✨
بواسطة طالب عالمي (6.6ألف نقاط)  
+4 تصويتات
مساء الخير

أن شاء الله ترجع مثل ما كانت يا رب ❤️

طريقة تقدمك للموضوع جميل جدا ❤️

دمت في أمان الله وحفظه ❤️
بواسطة طالب محترف (3.7ألف نقاط)  
صباح الخير ربى❤️
شكرا حبيبتي ❤️❤️❤️
ودمت كذلك❤️✨
بواسطة طالب متميز (2.3ألف نقاط)  
+3 تصويتات

صباح الخير رجاء كيف حالك ❤️❤️

يا الله علي حلب وجمالها حتي في العشر الأواخر اهل حلب لهم تقاليد خاصه بهم .

حقا رائعة كلامك عنها يشعر بأننا نعيش الأجواء معكم انها اجواء رائعة وان شاء الله يعود الأمل والطمأنينة والابتسامة من جديد علي وجه سوريا الحبيبة .

عندي بس سؤال صغير ما معني يقرطوا الطحل ؟ 

ملحوظة لك رجاء : عند قراءة اي شيء باللهجه السورية يتحول مخي الي وضع اللهجة السورية رغم معرفتي القليلة بها لكني حقا احبها واعشق سوريا تحية لك وسلامي لأهل سوريا ❤️

بواسطة طالب عالمي (6.6ألف نقاط)  
السلام عليكم
كيف حالك اختي رنا
آمين يا رب العالمين ❤️
يقرطوا : نفس مع ياكلوا لكن تختلف أن يقرطوا يعني ياكلوا بأجزاء صغيرة من الطعام
الطحل : ما تبقى من حبيبات القهوة في الفنجان
ونحن نحبك اختي ❤️
احبك الله حبيبتي ❤️
أن شاء الله أكون أفدتك بالتوفيق لك ❤️
بواسطة طالب متميز (2.3ألف نقاط)  
وعليكم السلام حبيبتي ربي أنا بخير والحمد لله كيف حالك ❤️❤️
شكرا لك عزيزتي علي التوضيح سعيدة جدا بمعرفتك ❤️❤️
دمت بأمان الله وكل عام وانت بخير وسعادة ❤️
بواسطة طالب عالمي (6.6ألف نقاط)  
دمت بخير حبيبتي ❤️ الحمد لله تمام
العفو اختي ، تشرفت بمعرفتك حبيبتي ❤️
وأنت بألف خير وصحة  وسعادة ❤️
بالتوفيق للجميع ❤️
بواسطة طالب محترف (3.7ألف نقاط)  
يب يب متل ماقالت ربى
بعتزر عالتأخر بالرد✨
شكرا كتير عالكلام الحلو رنا ❤️❤️
بواسطة طالب متميز (2.3ألف نقاط)  
صباح الخير رجاء ❤️
لا تعتذري حبيبتي الحياة كلها مشاغل واكيد الظروف ما بتكون متل ما بنريد كل الوقت .
أنا يلي بدي قول شكرا إلك كتير رجاء علي كلماتك واتشرفت كتير بمعرفتك انت وربي يا الله شو كتير طيبين وكلامكن حلو .
أتمني أن لا أكون قد خربت اللهجة السورية لا زلت بصدد تعلمها بالمناسبة أنا من مصر .
بالتوفيق رجاء أنت وربي دمتن بأمان الله ❤️
بواسطة طالب محترف (3.7ألف نقاط)  
حبيبتي رنا❤️❤️❤️
الشرف الي طبعا والله انو مبسوطة لاني تعرفت عشخصك المحترم❤️اول شي فكرتك من سوريا ههه❤️
دمت بالف الف خير وسعادة(:❤️
بواسطة طالب متميز (2.3ألف نقاط)  
والله أنا اللي سعيدة أكتر بالتعرف عليك حبيبتي رجاء ❤️❤️
ههههه شكرا لك رجاء علي كلماتك الرقيقة بالتوفيق ودمت بأمان الله ❤️
بواسطة طالب عالمي (8.9ألف نقاط)  
+2 تصويتات

سقى الله حلب و صب عليهم الخير صب 

بواسطة طالب محترف (3.3ألف نقاط)  
حبيبي يا ابا الاصدقاء
بواسطة طالب محترف (3.7ألف نقاط)  
اللهم امين شكرا جرير✨
بواسطة طالب عالمي (8.7ألف نقاط)  
+2 تصويتات

مساء الخير رجاء 

كيفك ان شاء الله تكوني بالف خير 

عنجد وانت بقرا حسيت انو انا عايشة باجواء ليلة القدر بحلب 

عنجد شكرا الك لانك في الشهر الكريم عيشتنا بحلب واحنا في بيوتنا في الطقوس والاجواء الرائعة 

+ تقديمك للموضوع رائع جدا احسنتِ 

تحياتي smiley

بواسطة طالب محترف (3.7ألف نقاط)  
صباح الخير شهد
تمام الحمد لله وانتي؟
شكرا لك عزيزتي ❤️❤️❤️
بواسطة طالب عالمي (7.1ألف نقاط)  
+1 تصويت
بصراحه...عيشتيني الأجواء...ما شاء الله ...

حسيت حالي منهم من جمال كلامك وتنقلك بين الأحداث...

الله يفرجها عليكم يارب...

وترجع الليله الجميله المباركه
بواسطة طالب محترف (3.7ألف نقاط)  
حبيبتي❤️
اللهم امين يارب ❤️
69 Online Users
0 Guest 69 Member
Today Visits : 26985
Yesterday Visits : 100359
Total Visits : 47584687

25.4ألف أسئلة

124ألف إجابة

154ألف تعليقات

29.7ألف مستخدم

مرحبًا بك إلى Taleek Discussion، مناقشات طليق - حيث يمكنك طرح الأسئلة وانتظار الإجابة عليها من المستخدمين الآخرين. تذكر اننا هنا جميعا لمساعدة بعضنا البعض فيرجى الالتزام بقوانين وارشادات المنتدى حتى نبقي عائلة طليق نظيفة وانتاجية - لا تنسى التصويت للاجابات الصحيحة والتصويت بالسلب للاجابات المضللة او المخالفة
add
لعبة السجن
...