ملاحظة:انا مابعرف بالزبط ايمت ليلة القدر بس يلي بعرفو انها بالعشر الأواخر ✨
قراءة ممتعة❤️❤️❤️
بعد هالافطار الفخم والتحلاية المعتبرة..بيتجمعوا اهل الكافيين وبيطالبوا بالقهوة..وراسن الف سيف ما بيتحركوا ليشربوا كل الفنجان ويقرطوا الطحل كمان..حتى يصحصحوا ويقدروا يشوفوا قدامن..بعدا بتقوم النسوان علمطبخ وبتبلش معركة الجلي....طرطقة طناجرة و صحون مطبقة فوق بعضها ..ومي و زوايد اكل هون و هون..ولوووصة مخيفة الها اول ما الها اخر..
( ما علينا خلونا بروحانية رمضان
)..
وقت قصير ومنبلش نسمع اصوات المآذن وهي عم تنشد وتدعي وتأذن لصلاة العشاء ومن بعدها التراويح..
صلاة التراويح بحلب واصوات المؤذنين المشبعة بالطرب الحلبي الاصيل والمقامات التقيلة.. بتعطي نكهة خاصة وساحرة لرمضان ..فالتسميعات بتصدح من المآذن الكتيرة و بتتشابك مع بعضها البعض و بتعطي روحانية عجيبة..
اصوات عذبة وحنونة ومطربة.. بتعشش بالذاكرة و بتشيل الهم عن القلب..وبالأخص بالعشر الاواخر ..لانو الجوامع الحلبية بتتفن بإحياء الليلة الفضيلة..وبتحتار كيف تجذب المصلين لعندها...لانو اغلب الناس بتحجز محلها بالجامع قبل الافطار بشوي من كتر ما الاحياء حلو ومحبب ..
لانو ليلة القدر بحلب الها خصوصية كتير..وتعتبر من الطقوس السنوية الهامة.. فأغلب الحلبية ان كانوا متدينين ولا معتدلين او حتى بعاد عن الدين ..بيتوحدوا هالليلة العظيمة وبيتسابقوا بإحياءها..و الجوامع على كبرها وكترتها و وساعتها بتتعبى عالاخر وصفوف المصلين بتصل لبرا..وبتنشل معها حركة السير تماماً وبتتوقف السيارات..ومنلاقي المشاة عم ينسابوا من كل حدب وصوب ومعن سجاداتن ومسابحهن وكم اكلة خفيفة ليتقووا فيها طول الليل..وافواج النسوان بتلحقهن بعد ما يأمنوا على الجلي وشغل البيت..
وبيبلش الاحياء وبتتعالى اصوات الناس بالابتهالات والادعية..بأصوات شجية وخاشعه.. وصلاة التراويح بعدها التسابيح وتلاوة القرآن ..بتنسمع بكل وضوح من كل قراني حلب ( اطراف) ..واعداد الناس بتكتر والاقبال بيزيد كل ما تأخر الوقت..وبيتنوع برنامج الاحياء في الجوامع مابين الصلاة والتسبيح والدعاء..وكلو مرتب و منظم ومدوزن ببرنامج مطبوع ومدروس متلو متل اي طقس من الطقوس المتوراثة ..
بتتلبس حلب بهي الليلة الفضيلة بتوب التقى والايمان..ومنستشعر ونحنا ماشيين بالشوراع الخالية من السيارات بشعور حلو كتير..شعور الصراحة صعب اوصفو..مزيج من الشعور بالأمان و الخشوع والفرح السكينة والطمأنينة ..( الي هلق وللاسف الشديد مفتقدينو 
)..
بتمضى هالليلة العظيمة ببطئ حلو كتير.. وبتستمر فيها الابتهالات والصلوات على فرد نفس هيك لتتطلع الشمس..وتتعب هالناس ويخلص برنامج الاحياء وتنتهي معها ليلة القدر الفضيلة..وتنتهي معها طقوس رمضان الكتيرة..و بتبلش طقوس عيد الفطر وتحضيراتو تحل محل المظاهر الرمضانية..
ودمتم برعاية الله....❤️(:
