السلام عليكم ورحمة الله وبركاته كيفكم(:
يعني الصراحة قد ماحكيت عن حلب مارح اقدر وصللكن فكرة شقد هي حلوة
المهم بحسكن صرتو تعرفو الحلبية حق المعرفة بعد ماحكيتلكن اكتر من مرة عنها
بسم الله نبدأ على بركة ❤️
الشعب الحلبي شعب بيحب البسط..كييف وكريم....وبطنو هي مصدر سعادتو..
ومابيبخل ومابيوفر جهد..للحصول على اللقمة الطيبة مهما كان الوصول الها بعيد وشاق..
رغم انو انواع الطبخ الحلبي معروفة عند كل الحلبية و بتشتغل فيو الست بشكل يومي و دائم..بس الرجال بيفتخروا وبيتباروا ببراعتن ..وبيستعرضوا معلمياتن الامتناهية وفهلويتن المنقطعة النظير في اختيار كل أكلة من مكان..ولا بيكلوا ولا بيملوا عن التفصيل والشرح واقناع المستمع بصحة وصواب وتميز اختيارن..مع انو المستمع بيستنا ليخلص شرح لينقض عليه ويبرهنل بالادلة القاطعة عن خطئو الكبير وغشمو..
مثلاً بشي عزيمة كبيرة ...وعليها كل ماتوصل اليه القاموس الحلبي من اكلات وطبخات...منسف فريكة كبير بالمكسرات..سندوانات..كبب بكل أنواعها واشكالها...جاط يبرق معتبر والدهن عم يشر ويلمع.......وغيرو وغيرو..بيمشي صاحب البيت وهو ناتع كرشو متر..معرض وفارد كتافو...وبيبلش يقسَم...
_خيو ...اش داقلك..انا قصابي منظوم كتييير وعلى كيف كيفك..صرلنا فوق الاربعين سنة مناخد من عندو..آدمي وبخاف الله..بوقف فوق راسو..وبطالعلك الهبرة وبفتح عيني منيح ومابخليو يغش او يفرملي ياها مع الدهنة..اي لكااان....دوق دوق هالكبة وانت احكم...
_لااا.....اش عم تحكي..غلطان كتير ..اصلا بلا معلمية عليك..( الجملة الاكثر تداولاً في حلب..) لحمة الكبة لازم يكون فيها دهنة من شان تشرشر علمنقل وهي عم تنشوى..وماتتطلع ناشفة....اي لكااان...(بينتقد وبياكل...كلشي لحال..)
_ لا خيو لا اش عم تخبص انت...اصولا هيك ..بزمانو ابوي الحاج محمود..الله يرحم ترابو..(بيغص بباقي الجملة...مدري من ذكرى المرحوم..مدري من قرص الكبة والسندوانات واليبرقات الي دخلن لتمو فرد لقمة...)
_تعيش...صحة صحة..ناولونا كاسة مي..رح يختنق الزلمة..
_ كان ياخدني معو بالعيد عالاضاحي.. (بيستناولو كم مخللاية...)...وهنيك اتعلمت وفهمت كل اللعبة..وصرت شيخ الكار...اسأل عني هنيك ..الكل حبايبي وصحابي.. وين العيرااان؟؟؟....
_اي اسمحلي اقلك (بلا مؤاخذة) انك غلطان كتيرر...(بيحكي هالجملة وهو عم ينتف منسف الخاررف...).
لا بيكلو ولا بيملوا..وبيتموا على هادا المنوال لبين ما يعلقوا ببعض ..وبيدخلوا بجدال عقيم بكل معنى الكلمة...وصواتن بتعلى....(بس مابيوقفوا اكل ابداً...)وممكن يدخل بيناتن باقي المعازيم ...ويخلصو بيناتن بأيديهن الزفرة...ويحلو كل القصة بكلمة ..خلص حجّي..فضوا سيرة بقى...اشتهيتلك هالقرص الكبة..بياكلو وبيتنغم بلذتو وبينسى كل الموضوع... وبيكملوا اكل ..وبيقضوا على كل السفرة قضائاً مبرماً ..ولا كأنو صار شي....لانو شعب طيب مهما اتوتر..بيضعف قدام اللقمة الطيبة ..وبيتعدل كل مزاجو...وبيرجع بيفرفح وضحكتو بتصير لورا اذنيه...بس طبعاً مع التعنت والتمسك الشديد برأيو..
فمنلاحظ انو لكل عيلة حلبية عريقة..قصاب خاص..وخضرجي معين..وحلواني مابيغيروا لو طبقت السما عالارض..حتى ولو غلى أسعارو...بالعكس هالشي بيرفع من قيمتو وبيعطي مصداقية اكتر انو اصولي ومابيغش...فهو ارث عائلي هام..وتغيرو هو الخيانة بحد ذاتها..
حتى بياع المعروك البسيط ما بيسلم من الدخول للسلالة..فبتلاقيو بيقلك..
_بسطة المعروك الي عراس الشارع عند الاشارات..معروكاتو طيبة كتيييير ..بحياتي مادقت اطيب من هيك معروك...طرية وحلوة بتذوب بلتم ذوبان....
_لا يييي اش عم تحكي (طبعاً مع الشد على مخارج الحروف..) اي مابتاكل طاول طاول..
_لااا خيو غلطان كتير... هيئتك ماجربتو...
_اش جربتو ماجربتو ..مدري كم مرة ابني الله يصلحو بالغلط جاب ..وكان عندي عزيمة ..ييييي تنذكر وماتنعاد...كبيناهن وسودلي وشي قدام ضيوفي....
_اي لا ...معنتا ابنك جاب من عند الزاوية التانية...انا عم احكي عن الزاوية الي على ايدك الشمال وانت رايح عالجامع..بتحطو بضهرك وبتتطلع سيوي..بيصير عشمالك...
_اي هاااا... اي قول هادا..فكرت التاني..قلت لحالي بعرفك مزوقك..( مرقت عخير هالمرة..)
بس يالطيف الحلبية اذا كان غضبولن عشي محل كانوا زباينو....خلص لا يعذب حالو...انقطع رزقو..وانضرب سيطو..لولد ولدو..بس مابحطها واطية ابداً..من شان كرامتو ماتنتزع...فبيقول قدام العالم..
_أصلاً من زمان ماكان عاجبني..وعم اترقد عمهل لأستدل عشي واحد غيرو...حرام مابيجوز اقطع برزقو للزلمة فوراً..بيتم صاحبنا وحبيبنا..
وكتير كتير من الأمثلة والمناقشات العقيمة..فكل واحد مفكر حالو صح..ومميز ..واختيارو هو الصواب بحد ذاتو...ومابيغير قناعاتو اللهم الا ما ندر..وهالشي بينطبق على مجالات كتيرة...مو بس بالأكل..فالكل معلم..والكل مسبع الكارات..بس هادا ان دل على شيء فهو انو الحلبي بشكل عام كرامتو عالية و صاحب مزاج ..وبيحب يفهم كلشي ..لانو اكره شغلة عليه هي انو ينغلب او ينضحك عليه..
خبروني شرايكن بحلب❤️(:
ودمتم برعاية الله..❤️