السلام عليكم ورحمة الله وبركاته
اليوم حبيت ورجيكن طقوسنا الحلبية بشهر رمضان المبارك ❤️(:
رمضان شهر ذو أهمية خاصة ومحببة لقلب كل حلبي ..شهر ذاخر بالطقوس والعادات الراسخة والمتوارثة بين الاجيال...الصراحة مهما كتبت وشرحت وفصّلت ما رح اقدر اجمع كلشي ..لانو باختصار ما رح تكفيو حلقة وحدة..
فالتحضير لرمضان عند البيت الحلبي بيبلش قبل فترة منيحة..لحتى يكون كلشي جاهز ومن مجاميعو لاستقبال الشهر الكريم ..فست البيت مثلاً بتعلن النفير العام على كافة الاصعدة..وما بتوفر جهد لاي مهمة..وبتم تشتغل وتخترع ورشات هيك ليبدأ اول يوم صيام..
عندكن مثلاً ورشة السمبوسك والشيش برك ..و طبعاً الورشة الاهم والاساسية ورشة الكبة..(مراجعة بوست الكبة)..و ما يرافقها من ترتيب للخزن وتعزيل للبيت وتعزيل خاص للفريزر..حتى شغل المونة والمربيات ومتعلقاتها.. لازم تكون جاهز وحاضرة كلها قبل رمضان..
فعقلية البطن الحلبي بتتخذ إجراءات حازمة وصارمة تجاه اي شي بيمنعو و بيبعدو عن متعتو بالاكل..فبتصيبو حالة هلع وذعر لمجرد فكرة انو رح ينحرم منو لفترة معينة..
فرغم انو البيت الحلبي مشهور بكثرة المواد التموينية والمستلزمات الاساسية لاي طبخة وبالاخص بشهر رمضان ..غير اننا منلاقيون قبل الافطار بالشوارع ومعبين المحلات ..الي بتكون هي كمان مستعدة و مجهزة بحلة خاصة لرمضان ..فالاسواق قبل رمضان بتقلب بضاعتها وبتحولها لبضائع رمضانية بحتة..وكل محل عندو كافه المستلزمات والاكلات الرمضانية..فمنلاقي فجأةً دكان معين او حتى كهربجي مالو علاقة بالاكل لا من قريب ولا من بعيد.. بيمشي مع التيار وبيتحول برمضان لحلواني و بياع معروك ومشاريب وتمور وتوابعو..حتى يسترزق..وهالعالم عم تفتل وتشتري وتعبي...منتشرين بكل مكان وشايلين اكتر من كيس..وكل ما يعدوا على محل لازم يدخلوا يتفرجوا و يشترولن شي اكلة..فواكة من هون وصفد حلو من هنيك..معروكة سادة من الطريق ومحشية من مكان محترم..سوس وتمر هندي وعصاير من عند شي براكة..يعني بصراحة بينفعو كافة الطبقات..ومصروفن برمضان بيزيد اضعاف مضاعفة..ومع ذلك ما بيوفروا او حتى بيناقشوا او بيترددوا بتلبية اي قائمة بتتطلبها منن النسوان..
بيشتروا اي طلب بصدر رحب على رغم من كثرة المصاريف و التعب والصيام وما يرافقها من اخلاق حميدة...بس اي شي للكرش بيهون..لانو لازم يدللوا بطنن بعد هالكم ساعة حرمان ويعوضوها بما لذ وطاب..
بيحملوا هالاكياس بحرص وحذر كانو عم يحملوا رضيع صغير..او طالعين من البنك وحاملين كيس مصاري كبير..و بيسوقوا بسرعة وبوشن عالبيت لحتى يلحقوا الافطار..فالحلبية برمضان بيعدوا الثواني وبيحفظوا مواقيت الصلاة بصم..لانو كل ثانية بتفرق معن... وبتقربن من متعتن الرئيسية..
فالسفرة برمضان وما ادراكم ما السفرة الحلبية كيف بتكون...سفرة عامرة بالطبخات و الكبب والمقبلات والاكلات وخلاصة خبرات ووصفات الستات الحلبيات...الي بتسر النظر وبتشبع العين وبتجمع العيلة حوليها..فالجمعة على سفرة الافطار تعتبر من الطقوس المقدسة والمقدسة جداً ..وخصوصي اول اسبوع من رمضان..بيقضيها الواحد عم ينعزم شي عند اهلو او عند بيت احماه..جمعة كبيرة وحلوة بتضم كافة الاعمار..بيجتمعوا وبيتسامروا ..وبيفطروا ..وطبعاً متل ما سبق وذكرت بالحلقة الاولى بيستعرضوا الرجال براعتن بقطع اللحمة وشراء باقي المواد..والنسوان من جهة تانية ما بيقصروا هنن كمان و بيتباروا بمعلميتن بالكبة و تعقيد مرقة السفرجلية وحموضة السماقية..وحلاوة وركازة اللحمة بكرز ..وبيتغنوا بلفة اليبرقاية الناعمة ومنظر منسف الفريكة الي عم يلمع مع المكسرات..ومعلميتن بالمحاشي..والسندوانات..( اكيد جعتوا )..
طرطقة صحون وملاعق..صحون طايرة وصحون نازلة..هاد بدو يتني..وهاد بدو يبدل صحنو لياكل غير اكلة..وهاد بدو ملح ليضيفها على فزلكتو..وصاحب البيت عم يعزم ويطج ايمان..وصاحبة البيت مفتحة اذانا علاخر وجاهزة لتسمع كل قصائد الغزل والمدح من المعازيم على نفَسها وطبخها الي مالو مثيل..والصبايا عم يخفقوا بين المطبخ والسفرة..والصغار والجيل التاني مجتمعين مع بعض عطاولة وحدة والكبير فين بيتغالظ عباقي الولاد على مين صايم ومين مفطر..
وعلى جنب في طاولة رديفة عليها صحون مغلفة واكياس مختومة واباريق عرقانة ..وجاط فواكة كبير..عم تستنى يجي دورها بعد الاكل حتى تنّسف هي كمان..فمهما تقل الاكل ومهما كان دسم وعم يلمع..لازم الحلبية يتحلّوا ..ومو حلو خفيف معاذ الله وبعيد من هون..حلو تقيل ومدسم ..كلو قطر وسمنة وقشطة و مكسرات وكلشي بيكتم على النفس وبيجيب الجلطة..بس المعدة الحلبية بتتحمل..وما اتسجل بتاريخ حلب حالة جلطة من ورا الاكل الحلبي برمضان..المهم بياكلوا وبينبسطوا وبتوكلوا على الله..
بتنفتح هالصفاد..وبتنصف جنب بعضها البعض ..وبترسم بجمالها لوحة شهية..وبيبلش السكب..وكلو بدو يدوق كلشي..الصراحة منظر الحلويات والمعاريك والكنافة بيفتح النفس وبينسي كل الاكل الي اتاكل من شوي..بتتعبى الكروشة وبتفضى السفرة ..وبتبلش التنهيدات و التنغيمات تعلى..وبتلوح بالافق صينية كاسات الشاي..الي عليها الحمل التقيل والمستحيل بحرق الدهون وتركيز المعدة..والكل بيصيح بصوت واحد..
_ايييييي اجت بوقتا..
بعتزر عالتطويل
ودمتم برعاية الله..❤️