First time here? Checkout the FAQ!
x

الملاحظات

طقوس حلب في رمضان❤️(:

في تصنيف اسئله عامه
بواسطة طالب محترف (3.7ألف نقاط)  
+10 تصويتات
380 مشاهدات

السلام عليكم ورحمة الله وبركاته 

اليوم حبيت ورجيكن طقوسنا الحلبية بشهر رمضان المبارك ❤️(:

رمضان شهر ذو أهمية خاصة ومحببة لقلب كل حلبي ..شهر ذاخر بالطقوس والعادات الراسخة والمتوارثة بين الاجيال...الصراحة مهما كتبت وشرحت وفصّلت ما رح اقدر اجمع كلشي ..لانو باختصار ما رح تكفيو حلقة وحدة..

فالتحضير لرمضان عند البيت الحلبي بيبلش قبل فترة منيحة..لحتى يكون كلشي جاهز ومن مجاميعو لاستقبال الشهر الكريم ..فست البيت مثلاً بتعلن النفير العام على كافة الاصعدة..وما بتوفر جهد لاي مهمة..وبتم تشتغل وتخترع ورشات هيك ليبدأ اول يوم صيام..

عندكن مثلاً ورشة السمبوسك والشيش برك ..و طبعاً الورشة الاهم والاساسية ورشة الكبة..(مراجعة بوست الكبة)..و ما يرافقها من ترتيب للخزن وتعزيل للبيت وتعزيل خاص للفريزر..حتى شغل المونة والمربيات ومتعلقاتها.. لازم تكون جاهز وحاضرة كلها قبل رمضان..

فعقلية البطن الحلبي بتتخذ إجراءات حازمة وصارمة تجاه اي شي بيمنعو و بيبعدو عن متعتو بالاكل..فبتصيبو حالة هلع وذعر لمجرد فكرة انو رح ينحرم منو لفترة معينة..

فرغم انو البيت الحلبي مشهور بكثرة المواد التموينية والمستلزمات الاساسية لاي طبخة وبالاخص بشهر رمضان ..غير اننا منلاقيون قبل الافطار بالشوارع ومعبين المحلات ..الي بتكون هي كمان مستعدة و مجهزة بحلة خاصة لرمضان ..فالاسواق قبل رمضان بتقلب بضاعتها وبتحولها لبضائع رمضانية بحتة..وكل محل عندو كافه المستلزمات والاكلات الرمضانية..فمنلاقي فجأةً دكان معين او حتى كهربجي مالو علاقة بالاكل لا من قريب ولا من بعيد.. بيمشي مع التيار وبيتحول برمضان لحلواني و بياع معروك ومشاريب وتمور وتوابعو..حتى يسترزق..وهالعالم عم تفتل وتشتري وتعبي...منتشرين بكل مكان وشايلين اكتر من كيس..وكل ما يعدوا على محل لازم يدخلوا يتفرجوا و يشترولن شي اكلة..فواكة من هون وصفد حلو من هنيك..معروكة سادة من الطريق ومحشية من مكان محترم..سوس وتمر هندي وعصاير من عند شي براكة..يعني بصراحة بينفعو كافة الطبقات..ومصروفن برمضان بيزيد اضعاف مضاعفة..ومع ذلك ما بيوفروا او حتى بيناقشوا او بيترددوا بتلبية اي قائمة بتتطلبها منن النسوان..

بيشتروا اي طلب بصدر رحب على رغم من كثرة المصاريف و التعب والصيام وما يرافقها من اخلاق حميدة...بس اي شي للكرش بيهون..لانو لازم يدللوا بطنن بعد هالكم ساعة حرمان ويعوضوها بما لذ وطاب..

بيحملوا هالاكياس بحرص وحذر كانو عم يحملوا رضيع صغير..او طالعين من البنك وحاملين كيس مصاري كبير..و بيسوقوا بسرعة وبوشن عالبيت لحتى يلحقوا الافطار..فالحلبية برمضان بيعدوا الثواني وبيحفظوا مواقيت الصلاة بصم..لانو كل ثانية بتفرق معن... وبتقربن من متعتن الرئيسية..

فالسفرة برمضان وما ادراكم ما السفرة الحلبية كيف بتكون...سفرة عامرة بالطبخات و الكبب والمقبلات والاكلات وخلاصة خبرات ووصفات الستات الحلبيات...الي بتسر النظر وبتشبع العين وبتجمع العيلة حوليها..فالجمعة على سفرة الافطار تعتبر من الطقوس المقدسة والمقدسة جداً ..وخصوصي اول اسبوع من رمضان..بيقضيها الواحد عم ينعزم شي عند اهلو او عند بيت احماه..جمعة كبيرة وحلوة بتضم كافة الاعمار..بيجتمعوا وبيتسامروا ..وبيفطروا ..وطبعاً متل ما سبق وذكرت بالحلقة الاولى بيستعرضوا الرجال براعتن بقطع اللحمة وشراء باقي المواد..والنسوان من جهة تانية ما بيقصروا هنن كمان و بيتباروا بمعلميتن بالكبة و تعقيد مرقة السفرجلية وحموضة السماقية..وحلاوة وركازة اللحمة بكرز ..وبيتغنوا بلفة اليبرقاية الناعمة ومنظر منسف الفريكة الي عم يلمع مع المكسرات..ومعلميتن بالمحاشي..والسندوانات..( اكيد جعتوا )..

طرطقة صحون وملاعق..صحون طايرة وصحون نازلة..هاد بدو يتني..وهاد بدو يبدل صحنو لياكل غير اكلة..وهاد بدو ملح ليضيفها على فزلكتو..وصاحب البيت عم يعزم ويطج ايمان..وصاحبة البيت مفتحة اذانا علاخر وجاهزة لتسمع كل قصائد الغزل والمدح من المعازيم على نفَسها وطبخها الي مالو مثيل..والصبايا عم يخفقوا بين المطبخ والسفرة..والصغار والجيل التاني مجتمعين مع بعض عطاولة وحدة والكبير فين بيتغالظ عباقي الولاد على مين صايم ومين مفطر..

وعلى جنب في طاولة رديفة عليها صحون مغلفة واكياس مختومة واباريق عرقانة ..وجاط فواكة كبير..عم تستنى يجي دورها بعد الاكل حتى تنّسف هي كمان..فمهما تقل الاكل ومهما كان دسم وعم يلمع..لازم الحلبية يتحلّوا ..ومو حلو خفيف معاذ الله وبعيد من هون..حلو تقيل ومدسم ..كلو قطر وسمنة وقشطة و مكسرات وكلشي بيكتم على النفس وبيجيب الجلطة..بس المعدة الحلبية بتتحمل..وما اتسجل بتاريخ حلب حالة جلطة من ورا الاكل الحلبي برمضان..المهم بياكلوا وبينبسطوا وبتوكلوا على الله..

بتنفتح هالصفاد..وبتنصف جنب بعضها البعض ..وبترسم بجمالها لوحة شهية..وبيبلش السكب..وكلو بدو يدوق كلشي..الصراحة منظر الحلويات والمعاريك والكنافة بيفتح النفس وبينسي كل الاكل الي اتاكل من شوي..بتتعبى الكروشة وبتفضى السفرة ..وبتبلش التنهيدات و التنغيمات تعلى..وبتلوح بالافق صينية كاسات الشاي..الي عليها الحمل التقيل والمستحيل بحرق الدهون وتركيز المعدة..والكل بيصيح بصوت واحد..

_ايييييي اجت بوقتا..

بعتزر عالتطويل 

ودمتم برعاية الله..❤️

من فضلك سجل دخولك أو قم بتسجيل حساب للإجابة على هذا السؤال

9 إجابة

بواسطة طالب محترف (3.6ألف نقاط)  
+2 تصويتات
رمضان ايامه كلها و طقوسه اجمل

و خصوصا طقوس السورية شخصيا اني احبها

جعفر من العراق

تحياتي الى جميع اهلي في سوريا الشقيقة
بواسطة طالب محترف (3.7ألف نقاط)  
شكرا اخي جعفر
عراسي. أهل العراق (:
بواسطة طالب محترف (4.9ألف نقاط)  
+2 تصويتات

ههههه شقد حلو كلامك وأسلوبك خيتو شهيتينا على هالأكلات الحلوة والله heart 

بواسطة طالب محترف (3.7ألف نقاط)  
هههههه تسلميلي حبيبتي ربي يسعدك❤️❤️
بواسطة طالب متحمس (1.3ألف نقاط)  
+2 تصويتات

وعليكم السلام

ماشاء الله، لقد استمتعت كثيرا وانا اقرا طقوس حلب، اعجبتني كثيرا!، شكرا لك على مشاركتنا هذه الطقوس الرائعة.

بواسطة طالب محترف (3.7ألف نقاط)  
الشكر لله أولا ثم لكِ على مرورك الجميل☺️❤️
بواسطة طالب متحمس (834 نقاط)  
+1 تصويت
ما شاء الله طقوس جدا حلوة

رمضان كريم.. بالتوفيق
بواسطة طالب محترف (3.7ألف نقاط)  
علينا وعليكم يارب
بواسطة طالب عالمي (6.6ألف نقاط)  
+1 تصويت
وعليكم السلام

دائما ما اسمع عن طقوس حلب الجميلة

مشاركة جميلة

بالتوفيق لك
بواسطة طالب محترف (3.7ألف نقاط)  
شكرا لكِ ربى
بواسطة طالب عالمي (5.9ألف نقاط)  
+1 تصويت

هههههههههههlaugh

حكيتي صح واللهي yesheart

كتابتك جدا ممتعة  ومشدة والله  بأسلوبك الحلو برافو عليكي يا قلبي 

بواسطة طالب محترف (3.7ألف نقاط)  
تسلميلي حبيبتي ☺️❤️
بواسطة طالب محترف (3.3ألف نقاط)  
+1 تصويت
اهلا بك اختي رجاء موضوع

من احب المواضيع للكرش الحبيب

الذي طالما انتظر رمضان بفارغ الصبر

بس لك خيت الله يسامحك انو ماحسنتي

تصبري لبعد الافطار لحتى تطرحي هالموضوع يعني وين نروح بحالنا هلق

لسا النهار بأولو.. البطن صارت تولول

مباركي عليكي الشهر :)
بواسطة طالب محترف (3.7ألف نقاط)  
ههههه بعتزر اخي محمد
علينا وعليك يارب (:
بواسطة طالب متحمس (1.0ألف نقاط)  
+1 تصويت
الف شكر لكم على الروعة وجمال الانتقاء سلمت يداكم على طرحكم الاكثر من رائع و الله يعطيكم الف عافيه وفي انتظار جديدكم دمتم بسعاده
بواسطة طالب محترف (3.7ألف نقاط)  
شكرا اخي الله يعافيك أن شاء الله(:
بواسطة طالب عالمي (7.7ألف نقاط)  
عُدل بواسطة
+1 تصويت

إِنّني أقعُ في حُبِ سوريا كٌلل يوم !

حلو جداا, يمييي ههههه

لازم تفكري تعزميني هيك شي يوم :'( تراني احب كل انواع الاكل بس اعزميني ورح اكل كل السفرة

كتير حبيت الحكي وطريقة الحكي !heart

بواسطة طالب محترف (3.7ألف نقاط)  
مريرم❤️❤️❤️
ههههه تكرمي.. تسلميلي مريوم❤️☺️
بواسطة طالب محترف (3.3ألف نقاط)  
بس حسبي حسابك
ديزني بعيدة من هون مشان تلحقي توصلي عالوقت
مو تجي بعد العيد
180 Online Users
0 Guest 180 Member
Today Visits : 18389
Yesterday Visits : 55702
Total Visits : 44244214

25.4ألف أسئلة

124ألف إجابة

154ألف تعليقات

29.5ألف مستخدم

مرحبًا بك إلى Taleek Discussion، مناقشات طليق - حيث يمكنك طرح الأسئلة وانتظار الإجابة عليها من المستخدمين الآخرين. تذكر اننا هنا جميعا لمساعدة بعضنا البعض فيرجى الالتزام بقوانين وارشادات المنتدى حتى نبقي عائلة طليق نظيفة وانتاجية - لا تنسى التصويت للاجابات الصحيحة والتصويت بالسلب للاجابات المضللة او المخالفة
add
لعبة السجن
...