كلنا عارفين ان الموسسات التعليمية مقصرة ف دورها، دراسة لسنوات طويلة بلا أثر ع المستوى الشخصي او على مستوى المجتمع، لكن الغريب ان يكون ف تقصير كمان من مؤسسة الاسرة، الأسرة لها دور كبير ف تشكيل الإنسان اكبر من دور المدرسة أو الإعلام، لذلك هكتب بعض من الادوار اللي مسئول عنها الأسرة ف المقام الاول:
1-حب التعلم مش ضروري الوالدين يعلموا ولادهم كل العلوم مثل اللغات والمواد العلمية والادبية والدين والفن وعلوم الكمبيوتر وغيرهم وإنما يعلموهم بقدر طاقتهم ويجتهدوا كمان لكن الأهم انهم يزرعوا فيهم حب التعلم وهم بنفسهم هيسعوا للعلم ويستمتعوا كمان
2-الاحترام زي احترام الكبير وتقدير الذات وتقبل الآخر واحترام اي انسان بغض النظر عن مستواه الاجتماعي او الاقتصادي او العلمي
3-تحمل المسئولية
4-الانتماء :الانتماء لدينه وأمته وأسرته وثقافته ونفسه ولغته وده طبعا له تأثير كبير علي بناء نفسية قوية سوية
5- دوره كخليفة الله وانه مسئول عن الناس والحيوان والنبات والكوكب نفسه بما فيه من جبال وبحار وانهار .. وكل ما خلق الله وصنع الانسان
6-الحفاظ على وقته واستغلاله فيما هو مفيد ونافع والتخطيط والقيادة والثقة بالنفس
7-النظافة سواء النظافة الشخصية او المكان من حوله
8-تذوق الجمال زي جمال السماء ف نهار خريفي او شتوي بالسحب وتدرجات الأزرق البديعة، جمال أوراق الشجر والزهور، حفيف الأشجار تغريد الطيور هديل الحمام، نسمات الهواء سجع الاشعار.. حقيقي الطبيعة بتنطق بالجمال والجلال الموضوع ده بالذات له تأثير كبير ع النفس البشرية بمرور الوقت بيحب ديما يحاط بالجمال مستحيل يقبل يرمي ورقة ع الارض او يقتل كائن حي زي حشرة او نبات، غير أن الجمال هو الملهم الأول للإبداع والمعلم الأول للزهد (هكلمكم عن الموضوع ده بعدين) و طبعا حث عليه الدين وهو التأمل
بشوية ملاحظة هنلاقي ان الحاجات دي مش محتاجة من الوالدين اكتر من تقديم القدوة واللين ف التعامل، مستحيل تعلمهم التأمل والاحساس بالجمال بالضرب والصراخ..
الواضح أن التقصير مش بس من المدارس لكن ف تقصير كبير من الأسرة َوهنا بنستشعر حجم المسئولية وخاصة مع حديث رسول الله"كلكم راع وكلكم مسئول عن رعيته"
اللهم صل وسلم على سيدنا محمد
ورزقكم الله التوفيق