قرأت منشورات لبعض الاعضاء وهما يقولون انه عدهم امتحانات ويريدون نصائح، واني هسه اجيت اعطيكم نصائح رح تفيدكم ان شاءالله
اولا لازم تخطط، شلون يعني؟ يعني جيب ورقه وقلم واكتب المواد الي انت مو خاتمها والمواد الصعبة والمواد السهله، مثال :
| الماده |
سهله او صعبة؟ |
| احياء |
صعبة وختمتها |
| رياضيات |
سهله بس بعدني ماختمت |
| فيزياء |
سهله بس بعدني ماقريت منها شي |
هذا مثال انت سويه على ورقه، وبعدين اكتب ايام الاسبوع وبكل يوم يا ماده رح تدرس، لكن بشرط تدرس باليوم الواحد ماده وحده، يعني مثلا يوم الاحد تدرس بس احياء ويوم الاثنين تدرس فيزيا وهكذا..
ثانيا كافئ نفسك وخذ استراحه، بنهايه اليوم كافئ نفسك، يعني جيب هديه صغيرة لنفسك مثلا اُكل شكولاة، او سوي شي انت تحبه، وهذا رح يحفزك + ادرس يومين ورا بعض وراها اخذ يوم استراحه، يعني مثلا ادرس الاحد والاثنين وبالثلاثاء اخذ استراحه
اثناء الدراسه لخص الماده، هسه من رح تدرس رح تمر عليك معلومات مهمه ومعلومات مو مهمه فأنت من تشوف معلومه مهمه اكتبها بورقه، بس بشكل مرتب
ابتعد عن الملهيات، يعني اعطي التلفون لواحد من عائلتك وقوله يخبيه حتى ماتلتهي بيه وماتدرس، واذا كانت دراستك تعتمد على التلفون او الابتوب ف للاسف ماكو حل وانت لازم تحاول ماتفتح المواقع والبرامج الي تلهيك عن دراستك + لاتفتح موقع طليق هواي حتى ماتلتهي عن الدراسه، افتح الموقع لمده ساعه باليوم فقط
............
هسه من هم الاشياء الابتعاد عن الناس السلبية يعني الناس الي تقولك انت ماتقدر والماده صعبه ومستحيل تختمها خلال هالفترة، ترا هذه الناس تحبطك وتخليك تترك هدفك، فأنت عليك تقترب من الناس الايجابيه يعني الناس الي تقولك انت تقدر
وصح على سيرة ( انت تقدر ) ف فعلا انت تقدر لانه ماكو شي اسمه مستحيل، كلمه مستحيل البشر اخترعوها والبشر يقدرون يخلوها تختفي، فهذا يعني انت تقدر وانت مستحيل تفشل، ولو فشلت ف الله اكيد كاتبلك خير بلي صار
.........
قبل يوم الامتحان لاتدرس الماده كامله بس اقراها قراءة سريعه واذا ماتصدقني ترا اكو دراسات اثبتت انه الدراسه والحفظ قبل ليله الامتحان تخليك تنسى كل الي درسته
وهمينه نام بكير واصحى بكير وترا اكو دراسات تثبت انه النوم المبكر يخلي العقل يتذكر الماده وماينساها
.......
وقبل دخولك للامتحان بقليل اقرأ قران واقرا دعاء ( اللهم لا سهل الا ماجعلته سهلا، وانت تجعل الحزنَ اذا شئت سهلا)
وان شاءالله الله يوفقكم كلكم وتوصلون للي تريدوه
وشكرا هوااي للقراءة
