السلام عليكم
تجربتي الشخصية
أنا بتكلم عبري كويس جدا وده لأني مش بس درسته في الجامعة لا وكمان لأني بحب اللغات بصفة عامة بس الصراحة كانت مشكلة الاستماع دي مسببالي نوع م الاحباط وكنت بقول ان الناس دي بتتكلم بسرعة وانا مش هقدر افهم هما بيقولوا ايه 
في بداية تعلمي للغة العبرية كنت بسمع الاذاعة العبرية عشا اقوي حاسة السمع عندي بس من وسط كل 10 كلمات كنت بفهم يا دوب كلمتين بس 
لحد ما ف يوم عرفت ايه هي طريقة عمل العقل البشري وازاي نستغل الموضوع ده في تعلم اللغات بصفة عامة 
كتير مننا ساعات بيصحي من النوم كله نشاط وحيوية وتفائل وفي أوقات تانية بيصحي من النوم وهو حاسس بالكسل والارهاق ومافيش رغبة انه يعمل حاجة طيب ده ليه وايه سببه ؟
المخ البشري بيفضل يكرر أخر فكرة وصلتله قبل النوم مباشرة وبيفضل يكررها في العقل الباطن طول ساعات النوم طيب بمعني انك تفكر دايما في حاجات ايجابية قبل النوم مباشرة نقول مثلا دولة نفسك تسافرها فكر فيها قبل النوم وتخيل نفسك فعلا سافرت الدولة دي فعلا
طيب ده ايه علاقة بالاستماع ؟
أقولك احنا قبل النوم نجيب الموبايل بتاعنا او اللاب توب ونشغل الاذاعة الخاصة باللغة اللي بتعملها مثلا انا بشغل الاذاعة التركية قبل ما انام مباشرة طيب ايه بقي اللي بيحصل ؟
أنا عقلي كده كده بيستقبل المعلومات عادي وانا صاحي مش نايم طيب لو نمت برضه عقلي الباطن يفضل يستقبل المعلومات ويكرر فيها طول ساعات النوم سواء بقي اللاب توب خلص الشحن بتاعه بعد ساعة او ساعتين طول ما أنا نايم عقلي الباطن بيفضل يكرر في المعلومات دي طول ساعات النوم كأني بالظبط بسمع ع الأقل الاذاعة التركية لمدة 6 ساعات يوميا مش بس نص ساعة يوميا
أنا جربت الموضوع ده في اللغة العبرية ولما عملت كده بعد 3 اسابيع بقيت بحس انهم مش بيتكلموا بسرعة ولا حاجة عادي يعني بيتكلموا زي ما احنا بنتكلم وحاليا بقيت وانا صاحي بعمل أي حاجة وفي نفس الوقت بسمع الاذاعة ومركز برضه ايه اللي بيتقال فيها
أتمني تكون تجربتي مفيدة ليكم وبعتذر ع الاطالة ف النهاية نحن بشر نصيب ونخطئ
