قصة صغيرة لحد ما نخلص امتحانات وارجع اكتب تاني عشان وحشتوني ومستني تعليقاتكم بفارغ الصبر ❤️
اللي هحكيه ده حصل من 10 سنين تقريبا بس اللي متأكد منه اني لسة بعاني من الكوابيس بسبب الليلة دي لحد النهاردة وشكلي هفضل أعاني منها طول حياتي
انا اسمي إبراهيم من 10 سنين قررت انا ومجموعة اصحابي نعمل مغامرة جديدة كنا قاعدين بنذاكر وحسينا بالملل فخدنا قرار غير حياتنا للأبد ،
مصطفى : ايه رايكم نعمل حاجة جديدة بدل الزهق ده
إسلام : وهنعمل ايه ي ابو العريف
مصطفى عينه لمعت وهو بيقول : هنزور قصر ليل
أسامة : لا ي عم كله الا كدة ده القصر ده مليان اللهم احفظنا هو احنا ناقصين
مصطفى : ي ابني كلها خرافات أنت عارف بلدنا دي مبنية ع الخرافات اساسا انا بصراحة شايف أنه قصر عادي ، مجرد قصر مهجور يعني مش مستاهل كل القصص اللي بتتحكي عليه دي
إبراهيم : انا مع اسامة ، انا جدتي حكتلي ع القصر ده بلاوي وحاجات كتير عن ناس دخلته ومخرجوش منه
مصطفى : اديك بتقول مخرجوش يبقا جدتك عرفت اللي قالته منين ، مش بقولك مجرد خرافات
إسلام : جماعة مش هنخسر حاجة واهي تجربة تكسر الملل اللي حاسين بيه
حسن : يلا نروح ي عم انت وهو متبقوش جبناء كدة هيحصلنا ايه يعني
علي : يا عم هو الموضوع كله حكايات عواجيز تعالو بس ومش هنطول عن نص ساعة جوا هنرضي فضولنا مش اكتر
بصيت لأسامة اللي هز رأسه بشجاعة مصطنعة وقال موافق
اتفقنا هنتقابل بعد نص الليل عشان ندخل نستكشفه بصراحة أنا كنت مرعوب ايدي كانت بتترعش وانا ماسك الكشاف لاحظ علي حركتي المتوترة فضحك وقال اسلام ابراهيم يقف برة ده بيترعش من دلوقتي ي عم
رديت عليه بعصبية : هو ايه اللي اقف برة ي عم الظريف انت وهو وبعدين انا مش خايف لا من ليل ولا غيرها ويلا ياخويا انت وهو ندخل في ليلتكم السودا دي
دخلنا القصر اللي كان مليان تراب بطريقة فظيعة لانه مهجور بقاله سنين طويلة وبما إن القصر دورين اتفقنا نقسم نفسنا فطلعت انا ومصطفى وعلي ف الدور اللي فوق وسيبنا اسلام واسامة وحسن ف الدور اللي تحت ، طول م احنا بنتحرك كنت حاسس بقبضة غريبة كدة وأني مش مرتاح لحد ما لمحت حركة غريبة من واحدة م الاوض لقيت نفسي تلقائي بشد علي وبدخل اشوف ايه اللي جوا وفجأة نطت قطة سودا عليا اتسببت في اني صرخت بصوت عالي فكلهم سمعوا وطلعولي عشان يعرفوا سبب الصرخة
أسامة: ايه اللي حصل مالك ي ابراهيم
رد علي وهو مش قادر يمسك نفسه من الضحك : الباشا مرعوب من قطة
اسلام : انا قولت الواد ده جبان ميدخلش معانا ده انا افتكرت ليل طلعتله ولا حاجة
مصطفى: خلاص ي جدعان م هو كان لازم يتخض بردو احنا داخلين مكان مهجور والقطة نطت عليه فجأة يلا انزلوا انتوا كملوا اللي كنتوا بتعملوه تحت واحنا هنكمل اللي كنا بنعمله
طبعا انا كانت اعصابي سابت تماما ومكنتش طايق علي ف سيبته لوحده وروحت مع مصطفى نستكشف الاوضة اللي كان فيها ، لقينا صندوق اسود وبمجرد ما فتحناه اشتغلت موسيقى غريبة ولقينا في صورة لبنت جميلة جدا ، شعرها اسود وعيونها واسعة وزرقاء كانت لابسة فستان ابيض بتاع عروسة وحواليها ست بنات ملامحهم مش باينة خمنت من حكاوي جدتي أن دي ليل ، الصندوق كانت حالته كويسة جدا عكس كل الحاجات المحروقة اللي حوالينا مصطفى راح ينده للباقي عشان يوريهم اللي لقيناه بس فجأة صوت الموسيقى اللي خارجة من الصندوق سكت و سمعنا صوت خبط جاي من كل حيطان القصر مع صوت صرخات لحد بيتعذب جاية من كل مكان ، الرعب ظهر ع وشنا كلنا وحاولنا نشوف اي مكان نخرج منه لكن كل الابواب والشبابيك اتحولت لحيطان مسدودة وفجأة اتخطف اسلام من وسطنا جوا واحدة من الاوض وبابها اتقفل بقوة ، كان اسلام بيصرخ بطريقة بشعة واحنا كنا بنحاول نفتح باب الاوضة بس مفيش فايدة الباب كان مقفول بقوة رهيبة لحد ما الاصوات كلها وقفت وسمعنا حد بينزل على السلالم ببطء شديد ومع خطواته رجعت الصرخات تاني واتفتح باب الاوضة اللي كان محبوس فيها اسلام وشوفنا منظر نشف الدم ف عروقنا ، اسلام كان متعلق من رجليه ف السقف وصدره مفتوح ومكان قلبه تجويف فاضي وعينيه وبقه مفتوحين ع آخرهم وعلي وشه نظرة واحد شاف رعب العالم كله جرينا كلنا نحاول نستخبى وندور ع مكان نهرب منه لكن مفيش فايدة ، الاصوات عمالة تزيد والموسيقى الغريبة اللي خارجة من الصندوق هي كمان عمالة تعلى وفجأة بدأت تخرج نار من كل حتة والحيطان والأرض تتحرك كأن في زلزال ، حسيت أن القصر هيتهد فوق دماغنا ، بدأت تخرج من النار دي كيانات سودا عيونهم بيضاء تماما وخطفوا اصحابي واحد ورا التاني ، حاولت اهرب للدور اللي فوق وساعتها شوفتها لابسة فستان ابيض متقطع مكان عيونها تجويف فاضي وجلدها عمال يقع بقها بينزل منه مادة سودا غريبة ، حاولت اجري بس ف ثانية كانت قدامي وحطت أيدها ع دماغي ، غمضت عيني وانا حاسس بسخونة ايديها لكن لما فتحت المنظر كله اتبدل القصر مكنش محروق ولا حاجة ولقيت ناس داخلة وخارجة طلعت فوق وعديت من باب اوضة معينة كأن حاجة بتشدني لقيتها جوا وكانت جميلة زي ما شوفتها ف الصورة وحواليها البنات اللي شوفتهم بس المرادي ملامحهم واضحة ، البنات دول طلعوا جدات اصحابي وجدتي انا كمان
ليل : القطع ده هيتعمل ولا كدة الفستان باظ ي راجية
راجية : متخافيش هخيطهولك ومش هيبان متتوتريش بس انتي ي عروسة ، ما تكمليلها مكياچها ي إحسان
شوفت راجية وهي بتحط قماشة ملفوفة شكلها غريب جوا الفستان وبتخيط عليها ، المشهد اتبدل وشوفت جدتي وباقي اللي البنات قاعدين حوالين ست شكلها غريب ف مكان شكله مش مريح
راجية : الجوازة دي مش لازم تتم ي ستنا ، البت دي من يوم ما الواد ابن الأكابر شافها وهو هيتجنن عليها
إحسان : البت ليل متستاهلش تعيش ف العز ده كله
ردت الست اللي كانت بتمتم بصوت واطي بكلام مش مفهوم : متقلقوش مش هتتم
جدتي : بس من غير ما نإذي ليل
ناهد : ما تخرسي يا بت انتي وتسيبي ستنا تشوف شغلها ولا انتي عاجبك اننا نعيش في الهم ده والست ليل تاخد كل حاجة
الساحرة: خدوا ده يتخيط ف حاجة من هدومها من غير ما تحس وساعتها بس هيتم المراد
لقيت نفسي ف القصر تاني وليل كانت لبست فستانها حاولت احذرها يمكن اقدر اغير حاجة لكني كنت بعدي من خلالها زي الهوا ف فهمت إن دوري اتفرج وبس
ليل : انا مش عارفة من غيركم كنت عملت ايه ي بنات انتوا بجد كل حاجة ليا انا بعتبركم اخواتي
عواطف : احنا كمان ي بت ي ليل يلا انزلي عريسك وصل
وبمجرد ما ليل مسكت ايد عريسها وخرجت قصاد الناس قدام باب القصر عيونها ابيضت وجسمها اتخشب وبدأت تتكلم بصوت غير صوتها
صرخت راجية : البت ليل دي ساحرة لازم نحرقها قبل ما تحل لعنتها ع البلد كلها
وفعلا بدأ الناس يرموا مشاعلهم ناحية ليل اللي فاقت وهي مش فاهمة ليه راجية قالت كدة وايه اللي بيحصل وبدأت النار تمسك فيها وف كل حاجة ف القصر حاولت جدتي تتدخل بس احسان مسكتها وبعدتها ، فضلت ليل تصرخ بس محدش لحقها وماتت جوا القصر ومات معاها الكيان اللي حضر ع ليل بسبب السحر واتحبست روح ليل مع عشيرة الكيان اللي سكنت القصر وهما اللي كانوا بيقتلوا اي حد بيدخله انتقاما لموته
وهنا رجعت للمشهد وروح ليل حاطة أيدها ع راسي وقالتلي انا هخرجك بس مش قدامي وقت طويل .. فجأة لقيت باب القصر اتفتح والكائنات دي هاجمت ليل .. جريت من غير ما ابص ورايا وخرجت من القصر .. قالولي اني جوا بقالي يومين وبالعافية حكيت اللي حصل لاصحابي وقولت لاهل البلد أن جثثهم جوا القصر، ليل أنقذتني وكانت بتوصلي رسالة .. ليل كانت مظلومة .. ليل مكانتش ساحرة زي ما قالوا هما اللي سحرولها واتسببوا ف قتلها .. فهمت ليه كلهم ماتوا بطرق غريبة ما عدا جدتي .. فهمت اني لازم اعرف الناس كلها ان ليل بريئة .. لازم روح ليل ترتاح
