فوفو ليس قطا
الجزء الثالث
ملخص الجزء الاول والثاني
احمد وامه بيعشقوا القطط وخاصة قط اسمه فوفو تدور حوله اساطير انه يتحول لرجل يضاجع النساء حسب ما يحلو له لكن احمد ولا احد من الرجال يعرف ذلك.. فهو سر قصرته النساء عليهن فقط . وحدث ذلك مع ليلى خطيبة احمد فقررت ان تتخلص منه انتقاما لها .. فهو لا تستطيع النساء مقاومته .
لكن كل شىء يتغير بنشوب حريق داخل منزل احمد وبموت احمد وكل افراد اسرته .
ليلى تنهار وتدخل المستشفى للعلاج وترفض فكرة الزواج حتى تقابل فؤاد الذي يقنعها بأن فوفو لن يعود .. لكن ليلى كانت تشك ان فؤاد هو فوفو عندما يتحول لمدى التشابه بينهما. قررت ان تحرق فؤاد لتتأكد ان كان هو فوفو ام لا .. يصاب فؤاد بحروق سوف تترك اثر لكن ليلى قررت ان تستكمل طريقها مع فؤاد لأن كل منهما يحب الاخر .
الجزء الثالث
--------------------------------------------------------
ليلى اتخطبت لفؤاد واتحدد ميعاد الفرح ليلى كانت سعيده . فؤاد طول فترة الخطوبة كان بيحاول يسعدها ويقولها اجمل كلام ممكن واحده تسمعه وملحظتش اي شىء غريب طول فترة الخطوبة .
في يوم كان ميعاد الفرح قرب خلاص قالها انه عايز يقولها شىء مهم جدا .. ليلى خافت لإن طول الفترة اللي فاتت كان خوفها من ظهور اي شىء غريب في حياتها معناه ان شكوكها كانت في محلها .
فؤاد كان متردد يتكلم وده اللي خلاها تخاف اكتر .. وبعد تردد قالها ان فيه في جسمه اثار من الحريقة هتفضل
وهتاخد فترة عشان تخف .. ليلى قدرت تتنفس وارتاحت شوية وقالت له فيما معناه انها معندهاش مشكلة في كده خاصة انها السبب في اللي حصله .
فؤاد كان بيلمح لشىء تاني بس مش قادر يتكلم وليلى لاحظت واصرت انه يتكلم .. فؤاد شرح لها ان منظر الحرق اللي ناحية جانبه اليمين تحديدا شكله غريب وانه في اول الحرق مكنش بالشكل ده لكن فضل يتغير لحد ما وصل للشكل اللي عليه دلوقتي . ليلى حطت ايديها على بقه عشان ما يكملش .. هي مش خايفة بس مش عايزه تحس بالذنب اكتر من كده .. وكمان حاسه ان فؤاد متأثر وصعبانه عليه نفسه ..ليلى فهمته انها راضيه بيه مهما يكون وانها حبته فعلا .. عشان كده فؤاد سكت رغم ان عينيه كانت بتقول كلام كتير .
الفرح خلص وكانت فرحة بجد ليهم هما الاتنين ولكل اهلهم .. روحوا البيت وغيروا هدومهم .. ليلى بصت على الناحية اللي على جنب فؤاد اليمين وصرخت صرخة مكتومه عشان فؤاد مايخدش باله .
لكن فؤاد بصلها بحزن وقالها ان هو ده اللي كان عايز يقولهولها .
الحرق كان على شكل وش قط .. قط اسمر .. سواد متحدد كأنه متحدد بقلم .. اقسم لها ان ده مكنش شكل الحرق في البداية ، لكن فضل يتشكل لحد ما وصل للشكل ده .
ليلى كانت منهاره وقضت الليله دي بعيد عن فؤاد .. محدش فيهم نام.. كل واحد كان بيفكر .. ليلى اتركز تفكيرها على فكرة محددة .. ان لعنة فوفو هتفضل تطاردها . فؤاد ابتدى يشك في الكلام اللي كان بيقوله لليلى .. ان الصدف والايحاءات هي اللي شكلت الاحداث اللي فاتت .. شك في كل الكلام ده .. وبدأ يصدق ان الحريق بتاع خطيبها احمد مكنش قضاء وقدر . حتى شكله ( فؤاد ) اللي شبه شكل فوفو لما بيتحول لراجل مش مجرد صدفه .
مرت ليالي كتير ولسه محدش عارف يقرب من التاني بسبب شكل الحرق . فؤاد حاسس انه ندم انه مسبش ليلى لما شاف شكل الحرق ، وليلى ندمت انها اتسرعت ووافقت على فؤاد . لكن هو ذنبه ايه ؟!
هو ملهوش اي ذنب .. الذنب ذنبها هي.. واى حد هترتبط بيه هيكون مصيره زي مصير احمد وفؤاد .
فوفو عايزها هي ..عايزها لنفسه .
لكن فين فوفو ؟!
ليه مظهرش تاني او حتى مظهرش بشكله لما يتحول ؟!
فين الجني ده .. ياريت يظهر ويخلصها .. ياريت يحرقها هي كمان عشان ترتاح !!
فؤاد بيتابع مع دكتور تجميل مشهور ورغم كده الدكتور محتار في الحرق ده .. مش عايز يتغير ولو حتى حاجات بسيطه !!
في يوم النور اتقطع ، فؤاد كان نايم في اوضته ، ليلى راحت تودي شمعة عشان لو صحي ميلقيش الدنيا ضلمه. ليلى دخلت ونور الشمعة كان خافت ، لكن اللي كان نايم على السرير مكنش فؤاد .. ليلى بصت وهي مرعوبه ودققت النظر .. كان فوفو لما بيتحول .
كان بيبصلها وعنيه بتنور زي عيون فوفو . حست انه هيقوم ويجري عليها ويعمل معاها زي اول مرة .. استنته.. ليلى بطلت تخاف . لكنه مقمش من مكانه فضل يبصلها بس ، وفجأة النور جه .. بصت تاني..المره دي كان فؤاد هو اللي نايم .. ليلى مبقتش عارفة هي مع مين دلوقتي فوفو ولا فؤاد .. حتى اساميهم متشابهه !!
ليلى صحت فؤاد من النوم مكنش متعود تدخل اوضته لانهم بيناموا كل واحد في اوضه .. هي حاولت تعيش معاه كزوج وزوجه مقدرتش بسبب منظر الحرق . وفؤاد احترم رغبتها .
فؤاد سألها اذا كان فيه حاجه بس هي مرضيتش تقوله ، قالتله بس ان النور كان مقطوع .
فؤاد خلاها تقعد جنبه على السرير .. حضنها بكل قوته وباسها .. اول مره يعمل كده من ساعة ما اتجوزوا.. مش عارفه يا ترى مين اللي بيبوسها هو ولا فوفو؟!!
ليلى دفعته عنها بكل قوتها وصرخت فيه انه ميعملش كده تاني!
فؤاد كان بيتقطع من جواه كان هاين عليه يجيب سكينه ويشيل الحرق من جسمه . ليلى اعتذرت وبكت جامد . فؤاد كان نفسه ياخدها في حضنه ويطبطب عليها لكن مقدرش .
فؤاد كان بيرجع متأخر بحكم شغله . كانت بتبقى خايفة وهي لوحدها عشان كده كانت بتجيب مامتها تقعد معاها .ليلى مكنتش قايله لمامتها وباباها عن موضوع فوفو ، حتى لما حاولت تحرق فؤاد قالتلهم انها مكنتش في وعيها وصدمة موت احمد كانت مأثرة فيها .
في يوم خرجت ليلى من المطبخ تدور على امها.. لما وصلت كانت امها مرمية على الارض في الاوضه وبتقول ان فيه قط اسود كان موجود في الشقة ولما دخلت وراه الاوضه مكنش موجود.. بس اللي في الاوضه كان راجل وزقها على الأرض و.. وفجأة امها سكتت ومكملتش بس ليلى عرفت ايه اللي حصل . طلبت منها توصفه .. وكانت نفس المواصفات اللي ليلى عارفاها .. العين الخضرا والشارب الأصفر .
ليلى اتأكدت ان فوفو رجع .
ليلى طلبت من امها تمشي ، كانت عارفه لما تمشي فوفو هيظهر .
ليلى فضلت تدور عليه وتنده له .
سمعت صوت من وراها .
-بتدوري على مين يا ليلى ؟!
بصت وراها بسرعه وهي مفزوعة. كان فؤاد ، بس هو دخل ازاي ، الباب مقفول ؟!
حاولت تتماسك وهي عندها شك ان اللى واقف فوفو ، قالت لنفسها هتلعب معاه .. مش هتضعف قدامه.. الضعف قدام عينيه هو اللي مكنه منها ومكنه من كل الستات قبل كده .
-كنت بدور على .. على فوفو .. فوفو القط !!
- ما هو واقف قدامك اهة يا ليلى !!
المره دي مش خايفة كان عندها ايمان انها هي الأقوي .. بإحساس الست .. ان الراجل حتى لو كان جن بيبقى عايز الست بإرادتها .
-طيب .. يا فوفو .. انت عاوز مني ايه ؟!
وعنيه بتلمع
-انتي يا ليلى ؟
- بتحبني اوي كده يا فوفو ؟!
- اكيد
ليلى كان نفسها تتأكد من حاجة مهمة .
-فوفو .. هو انت فؤاد ؟
فوفو لما سمع اسم فؤاد عينيه برقت واحمرت جامد وصوته اتغير بقى مخيف خلت ليلى تخاف
-انا بكرهه .. بكرهه
- ليه يا فوفو ؟
- لانه خدك مني .. انا هأذيه .. هأذيه .. انتي سامعه .
في اللحظه دي فؤاد فتح باب الشقة وفوفو اختفى .
فؤاد ما اخدش باله من حاجة بس ليلى كان باين عليها التعب والاجهاد.
المقابله دي رغم صعوبتها رسخت عند ليلى فكر جديد.. خلاص اتحررت من سطوة فوفو .. مش هتضعف قدامه تاني ، اصبحت هي نقطة ضعفه .. مش هيقدر يتمكن منها تاني .. هي اللي هتتحكم فيه .
فوفو كان بيظهر ليها تقريبا كل يوم في غياب فؤاد . ساعات على شكل قط وساعات على شكل بني ادم .
ولما كان بيحاول معاها كانت بتقرأ قرآن وتفكره بفؤاد .
في يوم فؤاد شاف قط اسود في الشقه ، راح نادى على ليلى .. ليلى طلبت منه انه ما يهتمش وانه ممكن يشوف القط ده كتير بعد كده .
فؤاد فهم ان ده فوفو وان دي بداية المشاكل .
نهاية الجزء الثالث .
