عمرك سألت نفسك ليه الناس بتذاكر كتير و تتعب في المذاكرة و في الآخر تحصيلهم مش عالي؟
ليه بنحس بالتعب أثناء المذاكرة مع إن جدول المذاكرة لسه مليان؟
هل في حل للموضوع دا ولا هنقعد كدا...
بس بالله عليك بلاش جو إمسك في الكرسي دا و إربط نفسك فيه علشان مابيأكلش عيش
حاضر ياسيدي....
قبل ما أقولك الحل تعالى كدا أقولك سر كدا...
هتقرب وتديني ودانك ولا ايه تعالى (^‿^)
تركيز المخ بيفضل في أحسن حالاته لمدة 30 دقيقة فقط من الشغل المتواصل
بيتهيألي كدا إنت ممكن تجيب الحل لوحدك
فكر في الحل و بعدا كدا كمل
الحل ببساطة هو انك تذاكر بضمير لمدة 25 دقيقة... وبعد كدا إيه أقعد أقول خلصت؟ ... لا مش هنضحك على بعض
انت تذاكر لمد 25 دقيقة و بعد كدا تسيب الكتاب متمسكش حاجة في إيدك ولا تليفونك ولا أي حاجة... تفضل قاعد على الكرسي عادي من غير ما تعمل حاجة لمدة 5 دقايق، أو تعمل تمارين رياضية بسيطة غير مرهقة لمدة 5 دقايق... وبعدها تمسك الكتاب تاني و تكمل مذاكرة
كدا انت عملت ايه؟ انت ضحكت على المخ
عرفت معلومة إنه بيتعب كل 30 دقيقة تركيز قمت مقسم وقتك على كدا
في نقطة تانية لازم تاخد بالك منها... انك مش بتقسم المواد
يعني ايه؟ يعني مثلا انت مش بتذاكر فيزياء 25 دقيقة و بعد كدا تقفل و تذاكر أحياء، لأ خالص إنت بتقسم الوقت مش المواد يعني انت هتفضل تقطع وقتك 25 دقيقة كل مرة الى أن تخلص الفيزياء وبعدها تاخد فاصل و ترجع تاني تذاكر أحياء بقى بنفس النظام
جزء تاني عايز ألفت نظرك ليه هو انك تكافئ نفسك بحاجة انت بتحبها بعد كل "مادة" تخلصها... أي حاجة ممكن تنفع عصير، مشروب ما أو حاجة تانية انت بتحبها في خلال النص ساعة فاصل بين المادتين.... دا هيشجعك تذاكر و تخلص مادة مادة
آخر حاجة أتمنى يا جماعة وقت المذاكرة الموبايل يكون فاصل شحن و مايتفتحش ألا لما تخلص كل شيئ في الجدول
أتمنى مأكونش ضيعت وقتك
سلام