First time here? Checkout the FAQ!
x

الملاحظات

في طريق رجوعي

في تصنيف اسئله عامه
بواسطة طالب محترف (3.8ألف نقاط)  
+7 تصويتات
592 مشاهدات

سهرت الليلة دي ونسيت نفسي في الشغل لحد ما انتبهت فجأة ولقيت الساعة بقت 2 صباحاً والوقت سرقنى .. قفلت الشغل وقولت هبقى اكمل اللي اتبقى منه بكرة، ونزلت ركبت العربية ومشيت في طريق رجوعي المعتاد عشان أروح ..

ولاحظت وانا ماشي بالعربية ان الليل الليلة دي حالك .. الأجواء كئيبة جدا على غير العادة، القمر مخنوق والظلام سايد اووى والجو ساقعة جدا ...

وأثناء تفكيري وملاحظاتي وتعبي وإرهاقي لمحت من بعيد زى حد مرمى في نص الطريق!!، هديت السرعة لحد ما قربت (ايه ده يا ساتر يارب ) ، لقيت واحدة مرمية في وسط الطريق وسايحة في دمها!!

 وعلامات الفزع على وشي ... فتحت باب العربية ونزلت قعدت اهز فيها يمين وشمال ولا حياة لمن تنادى مفيش اى حاجة ولا رد فعل واضطريت اشيلها ودخلتها العربية ومشيت وروحت على اقرب مستشفي ونزلتها من العربية ودخلت بيها من باب المستشفي وبدأت ازعق بصوت عالى حد يلحقنا حد يلحقنا ياناس .

 الغريبه مكنش في حد في الاستقبال بعد دقايق وانا مش عارف اعمل ايه وبجرى هنا وهنا جه دكتور كبير وقاللى انت صوتك عالى ليه ؟؟!

قولتله بصوت عالى ايه اللى عالى في واحده ماتت ولا بتموت وانتو مفيش حد هى حياه الناس سهله كده مردش عليا ونده ع الممرضات وجم اخدوها ومشيوا وقالى ببرود خليك هنا لحد ماتيجى الشرطه.. قولتله شرطه ..!!! قاللى اه الشرطه عشان نعمل محضر مش انت اللى خبطها .؟،

قولتله لا وحكيت له قاللى برضه مش هتمشي الا لما تيجى الشرطه .. قولتله انت هتحكى معايا شوف اللى بتموت دى ؟!

سابنى ببرود اكبر من الاول ومشى !!

الصراحه اتاخدت من نفسي كده وقولت شرطه ومحضر وسين وجيم انا راضيت ضميرى انا همشي وفعلا بسرعه مشيت..

عدى حوالى اسبوع والموضوع مبيروحش من بالى وبقول لنفسي اروح اسأل عليها لا مروحش وانا رضيت ضميرى وصراع مابين اروح او لا ..

قررت انى اروح .. خلصت شغل وروحت المستشفي بعد العصر دخلت .. مساء الخير في يوم كذا الساعه كذا وبدأت احكى وبعد مخلصت اتفاجأت من رد الموظفه مفيش يافندم حاجه من اللى بتقوله ده المستشفي كانت بتجدد والنهارده اول يوم تبدأ المستشفي في العمل من 3شهور 

نعم ؟؟!!! ازاى يعنى انا جيت هنا من اسبوع وكان في بنت عامله حادثه وجبتها هنا وفي دكتور ووصفتهلها وقالى ان الشرطه هتيجى ف انا مشيت

قالتلى والله يافندم المستشفي كان بيتجدد لمده 3شهور والنهارده اول يوم للعمل بعد التجديد ازاى حضرتك جيت من اسبوع ؟!!

قولتلها شكرا ولفيت وشي وانا ساكت ومصدوم في ايه ؟! وايه اللى بيحصل؟؟ انا كنت بحلم ؟؟! طيب انا اتجننت !!! اسأله كتير ومفيش اى اجابه !!؟

فات فتره وبدأت اتناسي يوم ورا يوم اهتمامى وتفكيرى ب اللى حصل بيقل يعنى بفتكره كده لما اجى انام دقيقتين وخلاص..

بعد سنه سهرت في الشغل ومروح وحصل تانى وشوفت البنت هى هى في الطريق قولت لا بقي المره دى المستشفي مفيهاش تجديد والبنت اهى قدامى اهى واخدتها وروحت ع المستشفي نزلت من العربيه وبفتح الباب لقيت زى كفن كده وفاضي ومفيهوش حاجه ! بلمت تنحت مش متمالك اعصابي عرق هو ده حقيقي ؟؟! فين البنت راحت فين واختفت ازاى ؟! هتجنن ؟! لقيت صوت بيقولى في حاجه يا استاذ ؟ انتبهت وقولتله لا لا مفيش كنت تعبان بس بقيت كويس وخدت العربيه ومشيت..

هو ايه بيحصل انا مش فاهم اى حاجه انا لازم انسي اللى بيحصل ده انا كده هتجنن !!

الموضوع مكنش بيروح من بالى وبعد فتره واحد صاحبي حكالى ع موقف تقريبا هو هو اللى حصل معايا مردتش وما اهتمتش وبكل قله ذوق قولتله طيب نكمل شغل بقى .. وسكتنا بس نفسي مسكتتش الاسئله رجعت جوايا تانى .. يعنى ايه يحصل كده معايا ومع شخص تانى نفس الموقف خلصت شغل وروحت ف ميعادى عادى جدا وشفتها المره دى في عز النور العربيات بتعدى وتقريبا انا بس اللى شايفها بس المره دى بصتلى وقامت عدت الطريق واختفت.. ومن ساعتها وكل فتره كبيره بشوفها مهما كان ميعاد رجوعى نايمه ع الارض واول مااقرب تقوم تقعد تبصلي وتقوم تعدى الشارع واتعودت ع كده .. ولا انا عارف ليه ده بيحصل لى .؟ هل ده بيحصل لنفس الشخص صاحب صاحبي ؟؟ لما كسفته مفتحش معايا الموضوع تانى.. اكتر من 4 سنين بشوفها كل شهرين مثلا وانا مش فاهم هو ايه اللى بيحصل !!!؟؟

الجزء التانى

في طريق رجوعى

بدأت اتأقلم ع التعود انى اشوفها.. وجت فتره كان بقالى كتير مباخدش اجازات وتعبت كمان فقررت اخد اجازه استرجع فيها مجهودى الذهنى والبدنى

وافقو ع الاجازه .. نزلت اركب العربيه .. وبظبط المرايات كده ووبص ع المرايه اللى فوق .. وكانت مفاجأه صدمه بعد ما كنت تقريبا نسيتها بس تقريبا .. لا اكيد هى مش نسيانى !! كان مكتوب "ساعدنى"

انا طبعا مش فاهم حاجه ولا مستوعب اساعدك ازاى يعنى وانا مشتت ومحتار وعمال اتلفت ورايا وقدامى يادوب كده عدت من قدامى .. ومن غير شعور دورت العربيه ومشيت وراها .. وبدأت كأنها بتقولى وبتدينى طرف الخيط اللى هساعدها بيه!!

راحت ع المكان اللى هى ماتت فيه وكنت بشوفها فيه دايما.. طيب ماشي انا دى فهمتها .. وده كمان طريق رجوعى للبيت.. انما ليه انا؟؟ اللى عايزانى اساعدك ؟!! معملتش زى كل مره فضلت مكمله وودتنى للمستشفي واختفت !!!!! انا بحلم ولا اتجننت ولا ايه؟!! كنت نزلت من العربيه.. اتصلت بصاحبي بسرعه عشان احكيله .. اتصلت بيه .. الو انت لسه في الشغل .. ؟!

قاللى اه .. قولتله انا راجعلك ..وقفلت...

دورت العربيه .. لكن العربيه مش بتدور !! مره واتنين وتلاته مش بتدور .. ولقيت ع الكرسي اللى جمبي ورقه شكلها غريب كده ومكتوب فيها:

" انا عايزاك تساعدنى.. ليه انت؟ عشان انت الشخص اللى هينفع توصلنى باللى قتلنى .. لانك مش قريب منه .. لكن تقدر توصله بسهوله ... متحكيش لصاحبك حاجه .... قريتها وانا مصدووم ودماغى اتشلت عن التفكير ... بدأت اهدى وافكر... ازاى اساعدها.. وليه انا ؟!! وافتكرت صاحبي لما كان بيحكيله ع صاحبه انه شافها.. وبدأت اجمع وافهم ليه انا؟ ممكن عشان انا معرفهوش فاقدر بطريقه ما صاحبي يوصلنى بيه..

دورت العربيه دارت وروحت لصاحبي.. فسألنى ايه ياابنى مالك.. قولتله مخنوق بس وتعبان قاللى طيب روح دلوقتى ونتقابل بليل .. كلمنى وتعالالى المنطقه عندنا ننزل بقي نقعد ع القهوه واعرفك ع صاحبي اللى كان بيشوف نفس مواقفك وعفاريتك ...

قولتله بس ده حوار قديم .. انا اسف لانى رديت رد مش كويس ساعتها .. بس فتحته تانى ليه؟؟ قاللى ياعم عادى تعالى بس ونقعد ندردش.. قولتله لا عرفنى ليه فتحت الموضوع ده بعد الفتره دى؟؟!

قال: ياعم صاحبي ده كان مره راجع من طريقك اللى بتروح منه بليل وخبط بنت بالعربيه وراح وداها المستشفي وماتت فخاف وكده ف هرب يعنى ومحاولش لا يعرف اهلها مين ولا حاجه.. فقولت احكيلك .. قولتله ب ابتسامه ماشي ياعم يارب متكنش زعلان بقي.. قاللى لا ياصاحبي تمام نتقابل بليل بقي.. قولتله ان شاء الله...

مشيت وانا مش مقتنع باللى قاله.. مش ده السبب اللى يخلى حد.مات يدور ورا حد.. ويبقي في عفريت او شبح عايش عشان ينتقم في حاجه اكبر صاحبي مخبيها.. او ميعرفهاش اصلا..

روحت ونمت .. مابين النوم ومابين انى لسه فايق .. في غفوه بس مش اكتر .. شفت الحقيقه .. !!!

واحد وواحد بيتخانقوا في عربيه .. كانو متحوزين وكانت بتقوله لازم يبقي رسمى واتخانقوا عشان عرف انها حامل... وفتحت الباب ونزلت لما الخناقه كبرت لانه هددها وهى بتعيط وجريت .. بعدت شويه وهو جري بسرعته كلها وخبطهااا .. نزلت اخدها ووداها المستشفي خدوها العمليات .. وهو هرب بسرعه عشان ميتسألش وتبان حادثه طريق .. فتحت عينى بسرعه لقيت ع المرايه كلام... قومت بسرعه وقربت.. كان مكتوب "شكرا" مفهمتش حاجه صاحبي كلمنى.. جاى ؟؟ قولتله اه نزلت وروحت وقعدنا وجه صاحبه واتصدمت اول ما شفته... هو هو الشخص اللى قتل البنت.. بنفس الهدوم حتى .. ياابنى ده صوت صاحبي مالك الراجل بيقولك ازيك؟؟ قولتله اسف اسف متوتر بس .. قعدنا وسلمنا وشربنا واتكلمنا وحكالى نفس اللى صاحبي حكاه وحكتله اللى كنت بشوفه.. لكن غيرت بعض الكلام .. وان الموضوع انتهى ... خلصنا قعدتنا وروحت وانا مش عارف ايه اللى بعد كده .. ايه مطلوب منى تانى؟! رجعت البيت اول مادخلت الاوضه لقيتها واقفه في زاويه الاوضه .. جيت اولع النور بسرعه لكن مبينورش.. مش شايف ملامح مجرد واحده.. قالتلى "شكرا" .. قولتلها انا مش فااهم .. مش فاهم شكرا ع ايه ؟؟ "شكرا لانك وصلتنى ليه" ده كان ردها واختفت .. انا. انا بجد مش فاهم اى حاجه خلااااص.. دوخت ورميت نفسي ع السرير .. ونمت من كتر اللى بيحصلى.. وشوفته في نومى وهو بيموت نفس الموته اللى هى ماتتها .. هى المره دى اللى بتقتله.. اتفزعت وانا مش عارف اعمل ايه؟؟! لقيت رساله ع الموبيل .. "متخافش مش هتشوفنى تانى" .. قولت لنفسي خلاص بقي لازم اخرج من الكابوس ده وحجزت ع اول قطر ورجعت الصعيد لاهلى .. ومع مرور الوقت وقعدت الاهل اللى بقالى كتير مشفتهمش نسيت تقريبا... وكنت قافل تليفونى ع طول... خلصت الاجازه للاسف.. لازم ارجع القاهره.

حضرت نفسي وفتحت التليفون لقيت ان صاحبي ده بيحاول يكلمنى .. اتصلت بيه.. كان رده عادى ايه وعامل ايه واخبارك اهلك والبلد نسوك صحابك ياعم .. شهر كده معرفش عنك حاجه؟ قولتله انا راجع اهو ياعم وهتزهق منى .. وقفلنا عادى جداا.. ورجعت القاهره ..

تانى يوم قابلته في الشغل . قاللى شوفت اللى حصل .. ؟؟

قولتله ايه اللى حصل؟؟!

قاللى مش صاحبي عمل حادثه ومات..

رديت با ستغراب .. انت مش هامك كده ازاى انه مات؟!

قاللى هو عمل حادثه حد خبطه بعربته .. بعربيته هو ازاى معرفش ! ونقله ع نفس المستشفي اللى قال انه نقل البنت عليها اللى هو وانت حكيته عنها!! بعد كل ده ودفناه وخدت مفتاح عربيته اشيله حاجته منها وكده عشان والده كان هيبيعها.. لقيت ورقه ..عقد جواز عرفي وتسجيل ع موبايله.. في خناقه مابينه ومابين بنت انه مش هيتجوزها وانها حامل.. وكده . . انا عرفت الحقيقه ع فكره .. البنت دى ظهرتلى وقالتلى شكرا وقول لصاحبك شكرااا

يلا الله يرحمه بقي..

تمت..

"في طريق رجوعى"

من فضلك سجل دخولك أو قم بتسجيل حساب للإجابة على هذا السؤال

7 إجابة

بواسطة طالب محترف (2.9ألف نقاط)  
+6 تصويتات
جعلتني اشعر بالأسى عليك

حسبت ان القصة حدثت معك حقا

أخذت اسرع في القراءة لأكتشف ما الذي تحمله النهاية بين طياتها

سامحك الله اخي اتق الله فينا ههههههه

على اي حال قصة رائعة

بالتوفيق ان شاء الله
بواسطة طالب محترف (3.8ألف نقاط)  
ههههههههههههههههههه
دي حاجة بتكون في العنوان و الكتابة لجعل القاريء يظن أنها حدثت مع الكاتب و في النهاية يظهر الحقيقة .
حسناً ، سأتق الله فيكم . ههههههههههههههههههه
شكراً جزيلاً لك
و بالتوفيق لك أيضاً إن شاء الله
بواسطة طالب عالمي (7.6ألف نقاط)  
+4 تصويتات
اشكرك اخي علي ولكن القصه فيها وحي من الخيال بشكل كبير ✨
بواسطة طالب محترف (3.8ألف نقاط)  
أعمل إيه
الخيال عندي منذ الصغر
بواسطة طالب عالمي (8.7ألف نقاط)  
+4 تصويتات

السلام عليكم ورحمه الله وبركاته ❤️ 

مساء الخير ❤️ 

رووووووعه بجد 

استمر...

بالتوفيق ❤️⁦(✿^‿^)⁩ 

بواسطة طالب محترف (3.8ألف نقاط)  
و عليكم السلام و رحمة الله و بركاته
مساء النور
شكراً جزيلاً لك
و بالتوفيق لك أيضاً إن شاء الله
بواسطة طالب عالمي (8.7ألف نقاط)  
+3 تصويتات
مساء الخير

قصة روووعة رووعة بجد

احسنت علي
بواسطة طالب محترف (3.8ألف نقاط)  
مساء النور
شكراً لك على كلامك
بواسطة طالب جديد (19 نقاط)  
+2 تصويتات
قصه رااااائعه جدااااااا استمر

اتمنالك التوفيق والنجاح في حياتك  ربنا يوفقك
بواسطة طالب محترف (3.8ألف نقاط)  
شكراً جزيلاً لك
اللهم آمين
بواسطة طالب محترف (4.0ألف نقاط)  
+2 تصويتات
قصه رائعه

استمر
بواسطة طالب محترف (3.8ألف نقاط)  
شكراً جزيلاً لك
إن شاء الله
بواسطة طالب متحمس (1.2ألف نقاط)  
+1 تصويت

السلام عليكم 

قصة رائعة وجميله 

بالتوفيق لك 

استمر

بواسطة طالب محترف (3.8ألف نقاط)  
و عليكم السلام و رحمة الله و بركاته
شكراً جزيلاً لك
و بالتوفيق لك أيضاً إن شاء الله
إن شاء الله
121 Online Users
0 Guest 121 Member
Today Visits : 32593
Yesterday Visits : 56116
Total Visits : 44202745

25.4ألف أسئلة

124ألف إجابة

154ألف تعليقات

29.5ألف مستخدم

مرحبًا بك إلى Taleek Discussion، مناقشات طليق - حيث يمكنك طرح الأسئلة وانتظار الإجابة عليها من المستخدمين الآخرين. تذكر اننا هنا جميعا لمساعدة بعضنا البعض فيرجى الالتزام بقوانين وارشادات المنتدى حتى نبقي عائلة طليق نظيفة وانتاجية - لا تنسى التصويت للاجابات الصحيحة والتصويت بالسلب للاجابات المضللة او المخالفة
add
لعبة السجن
...