السلام عليكم ورحمة الله وبركاته متعلمي اللغة الانجليزية والمتحيرين بين طليق وذي اميركان انجلش
حبيت اشارك فكرة مع حضراتكم تخلي حضراتكم توازو في التعليم ما بين طليق وذي اميركان انجلش
الفكرة كالاتي:
هتفتح برنامج ذي اميركان انجلش وتحضر دفتر تذاكر فيه، لو انت في المستوى الاول ف دي خطة الدراسة اللي انصح بيها
١- ابدأ بكورس تعلم من الصفر ٢- بعدين انتقل لكورس القراءة ٣- بعدين انتقل لكورس الاستماع ٤- بعدين انتقل لكورس الصوتيات ٥- بعدين انتقل لكورس المحادثة ٦- بعدين انتقل لكورس القواعد ٧- بعدين انتقل لكورس الكتابة ٨- بعدين انتقل لكورس النصائح
بعد ما تفتح البرنامج، هتفتح الكورس اللي انت بتذاكر فيه وتحضر الدفتر الخاص بالكورس هتفتح الحلقة اللي عليها الدور وتشوف الحلقة لاول مرة من غير اي كتابة في الدفتر كأنك بتشوف فيلم بعدين هتشوف الفيديو تاني وتكتب في الدفتر بالطريقة الصحيحة المناسبة للكورس، طب ايه هي الطريقة الصحيحة، بص يا صديقي، لو انت في كورس خاص بالكلمات والجمل زي كورس تعلم من الصفر يبقى هتكتب الكلمة ومعناها بالعربي وتكتب الجملة اللي فيها الكلمة دي ولكن اوعى تكتب ترجمة الجملة، اما اذا كنت في كورس محادثة فأنت هتكتب الكلمة الجديدة عليك وترجمتها بالعربي وتكتب تحتيها الجملة الخاصة بيها وبرضو مش هتكتب ترجمة الجملة، كل الكلمات والجمل هتكتبها في صفحة منفصلة، اما بقى نص المحادثة هتكتبو في صفحة تانية منفصلة ومن غير اي ترجمة وحاول تمثل انك طرف في المحادثة، اما لو بتذاكر كورس استماع ف ده مفيش فيه كتابة فقط هتلتزم بالتعليمات، اما لو بتذاكر كورس الشرح فيه بالانجليزي ف ده هيكون ليه دفترين، الدفتر الاول هتكتب فيه الكلمات الجديدة عليك والجملة الخاصة بيها ولكن ولا تترجم الكلمات ولا الجمل والدفتر التاني هتكتب فيه الكلمات اللي انت متوقع انك تنساها وتكتب ترجمتها، اما بقى القواعد هتسمع فيديوهاتها فقط واوعى تكتب حاجة في الكورس لأن مش هيكون للكورس ده دفتر، ولو قلت انك هتنسى القواعد ففيه حاجة اسمها الملاحظات في كل حلقة حمل ملخص الدرس بتاع القاعدة واطبعو عشان يكون عندك ملخص ليه تراجع منو ولكن ما تكتبش حاجة في القواعد
بعد بقى ما تخلص حلقة اليوم في ذي اميركان انجلش هتفتح برنامج طليق وتذاكر الفيديو اللي عليه الدور ولكن ما تكتبش اي حاجة في الدفتر ولا حتى تخصص دفتر لكورس الانجليزي في طليق الا لما توصل لمهارة الكتابة
ليه بقى ما تكتبش حاجة في الدفتر، اولا عشان دروس طليق تفاعليه ومش هتحتاج تذاكر، ثانيا عشان انت كتبت في الدفتر لما كنت بتذاكر في ذي اميركان انجلش فأنت بتستخدم طليق عشان يرسخ اللغة في عقلك ال لا واعي
وانصحك انك تذاكر حلقتين في اليوم بس من البرنامجين
يعني حلقة واحدة في اليوم من ذي اميركان انجلش على حلقة من طليق ( بس )
اتمنى اكون قدرت افيد حضراتكم
اما بقى متعلمين اللغات المختلفة فأنتو محظوظين لأن مفيش غير مصدر واحد تتعلمو منو
وبالنسبة لمتعلمين اللغات المختلفة شدو حيلكم كده هنشوف احنا متعلمي اللغة الانجليزية اللي هننتصر ولا حضراتكم ههههه
