السلام عليكم ورحمه الله وبركاته ♥️
اكيد سمعت قبل كدا عن الناس التافهه اللى بستنشق هيليوم عشان تغير صوتها
بصراحة أنا من الناس التافهه دى و نفسى اجرب الموضوع ههههه 
بس عمرك سألت نفسك لييييه ؟؟؟؟؟
ليه الهيليوم يقدر يغير طبقة صوتك مهما كانت قوية و يخليها شبه صوت السناجب فى فيلم كارتون Alvin and the Chipmunks 
تعالى معايا نشوف الموضوع دا
بص يا سيدى احنا صوتنا فى الأساس بيخرج بسبب حدوث اهتزازات داخل الحنجرة يعنى الهواء لما بيدخل حنجرتك بيصتدم باحبالك الصوتية و الاصتدام دا هو اللى بيعمل الاهتزاز اللى بنفسره على هيئة صوت مميز عند كل شخص عن التانى .
هتقولى جميل ايه علاقة الهيليوم بقى ؟؟؟
حاضر اصبر عليا هقولك اهو
الفكرة انك فى الطبيعى بتتنفس هواء عادى مكون أغلبه من نيتروجين و اكسجين
و كثافة النيتروجين و الأكسجين أعلى بكتير من كثافة الهيليوم
عشان كدا انت لما تبقى تافه و تروح تحط لنفسك هيليوم تستنشقه بدل الهواء الطبيعى اللى هيحصل أن صوتك هينتقل بسرعة عالية بسبب كثافة الهيليوم القليلة و هو دا اللى بيخلى صوتك يضحك و شبه صوت السناجب
و لو فكرت تجرب استنشاق الهيليوم متستنشقوش لفترات طويلة لانه ممكن يكون خطر و يسبب اختناق بعد الشر عليك طبعا يا جميل .
يارب تكونوا استفدتوا و الموضوع عجبكم
دمتم بخير احبتى ♥️
