السلام عليكم ورحمه الله وبركاته ♥️
دى اول تجربة ليا فى مبادرة لدمج المعلومات العامة بتعلم اللغات على قد ما اقدر لأن دا هدف الموقع يارب الطريقة تعجبكم .
هطلب منكم انى كل موضوع هتكلم عنه هكتب جملة بلغة بنتعلمها مع طليق و انت المفروض تحفظ الجملة المتعلقة باللغة بتاعتك و تكتبهالى فى التعليقات .
الجملة اللى هنتكلم عنها هى صيغة " انا احب ..... "
انا هكتب مكان النقط أسماء اكلات لان دا موضوع الحلقة بس انت تقدر بعد كدا تحط اى حاجة من عندك المهم تعرف الصيغة نفسها باللغة بتاعتك .
1- الهمبرجر / 
نبدأ بحاجة كلنا عارفينها جربناها و بنحبها 
بص يا سيدى اسمه نسبة لمدينة هامبورج الالمانية
و طبعا زى ما انتوا عارفين أنه أكلة أمريكية و تعتبر من الوجبات السريعة و انتشرت بسرعة فى العالم .
اكيد بتسأل طب مادام هى أمريكية ايه علاقة مدينة هامبورج الالمانية بالموضوع ؟؟. بص يا باشا
ظهر الهمبرجر فى روسيا و كان اسمه (ستيك التارتار) و بعدها انتقل الى مدينة هامبورج الالمانية و منها إلى نيويورك و سمى بالاسم دا لجذب البحارة القادمين من ميناء هامبورج ، و فضل الهمبرجر يتطور لحد ما وصل إلى شكله الحالى اللى كلنا بنحبه 
.
يلا يا متعلمين اللغة الإنجليزية اكتب ورايا و احفظ
انا احب الهمبرجر I love Hamburger
يلا بقى يا بتوع الألمانى
انا احب الهمبرجر Ich liebe Hamburger
حلو كدا يلا اللى بعده
2- السوشى /. 
السوشى دا اكل يابانى مشهور اكيد سمعت عنه قبل كدا دا عبارة عن رز مخلل و معاه سمك نئ بس الغريب هو اداب تناوله عشان دا الوحيد اللى فيه استثناء و تقدر تأكله بإديك أو بالعصى . و حسب التقاليد لازم تبدأ بقطعة اللحم البيضاء و بعدها تتابع نحو الاغمق (الادكن) بالترتيب و تغمس السمك فى صوص الواسابى
فى خناقة كبيرة بسبب استاذ السوشى دا بين اليابان و الصين و كل واحدة شايفة أن السوشى بتاعها و و لا واحده معاها دليل قاطع يثبت . و الغريب أن اليابان بتكتب كلمة سوشى بحروف الكانجى الصينية هى مش بتقول أنه يابانى و بتاعها امال بتكتبه بالصينى ليه ههههه
المهم ....
يلا يا بتوع الصينى اكتب
انا احب السوشى 我爱寿司
يلا يا بتوع اليابانى
انا احب السوشى 寿司が大好き
حلو كدا عشان منزعلش حد دا حتى الصين و اليابان ولاد عم مش كدا مش هنتخانق عشان سمك نئ يعنى
3- الراتاتوى /
استغربت الاسم مسمعتوش قبل كدا صح ؟. 
طب بص للصورة مش بتفكرك بحاجة 
أيوة هو اللى فى دماغك دا هههههه
هى دى الأكلة اللى اتعملت فى فيلم كارتون الفار الطباخ
و دا طبق يخنة فرنسى تقليدى مشهور جدا
يلا يا بتوع اللغة الفرنسية
انا احب الراتاتوى J'adore la ratatouille
يلا نحلى بقى
4- المثلجات (الايس كريم )/ 
الايس كريم دا بقى غريب جدا و ملوش دولة معينة اخترعته .... استغربت ؟ الايس كريم دا لف العالم كله .. طب بص معايا
بدأ الايس كريم عند الرومان و الفرس و بعد كدا الصينيين و بعدها راح عند اثرياء ايطاليا اللى حطوا فيه لبن على التلج و بعدها جات الأميرة كاثرين لما بقت ملكة فرنسا انتقلت معاها الخلطة من إيطاليا إلى فرنسا و لما قام الملك الانجليزى تشارلز بزيارة إلى فرنسا قدموله اللبن المثلج دا و عجبه راح اشترى الخلطة من فرنسا و اخدها على انجلترا و من هناك على نيويورك و بدأت هناك أول مؤسسة تجارية لبيع الايس كريم و بعدها و صل للبيت الأبيض و بعدين بفترة وصل لعامة الشعب بعد ما زار الايس كريم العالم كله و بعد تطورات كتير و كل دولة تحط اللمسة بتاعتها وصلك الايس كريم بالشكل اللى احنا نعرفه . 
و كدا انا ابقى خلصت موضوعى اتمنى يكون عجبكم و يارب ميكونش ممل بالنسبالكم ...
يارب تستفيدوا من فكرة دمج اللغات و تطبقوها فعلا فى الاجابات و تحفظوها و عرفونى لو عندكم افكار جديدة ♥️
دمتم فى رعاية الله احبتى ♥️
