يوم الكبة...
يوم لايقل اهميةً عن يوم التعزيل..وهو غالباً بيجي بعدو..او قبل رمضان ..او شي مناسبة كبيرة..
يوم مفصلي في حياة الفريزر..لانو بيتحضر قبل كم يوم متل تحضير مريض عملية القلب المفتوح..
بيتفضى عالاخر ..وبينشال الفيش..وبينفرك وبيتليف..حتى يكون جاهز لاستقبال الكم الهائل من الصواني والجاطات...
بتبلش ست البيت بتحديد هاليوم قبل بأسبوع..بيقطع الزوج اللحمة وبيتوصى فيا..بوقت بتكون ست البيت عم تجهز المكسرات بأنواعا..>
وبتعمل الام اتصالاتها السرية وبتلطش حكي غير مباشر قدام كل اهلها انو عندا شغل كبة..لتشوف مين المتتطوع التلقائي الي رح يساعدها..وغالباً بهيك لحظات الكل بيسكت...فبتضطر تحكي بشكل مباشر....
__ماما... من بعدك لا حدا يعمل الكبة..انت بس تعي واشربي قهوة ودوقي الملح..انت الخير والبركة..
هيك لتلقط الام المسكينة الطعم بإرادتها ..وتلبي الدعوة رغم معرفتها انو اتلبست بالكبة كلها...
بيجي اليوم الموعود..وكلشي بالمطبخ بيتضاعف حجمو..
ماكينة ضخمة وعملاقة..تلة هائلة من كياس اللحم..طشت غسيل ملان برغل..طناجر من قياس إكس لارج..ملاعق بتاكل فيا الغيلان( جمع غول وهي كلمة انقرضت من ايام قصص المكتبة الخضراء)...صواني بتسد عين الشمس..حتى علبة الملح بتصير ضخمة..والملفت للنظر دائماً انو المرا الي بتساعد بعجن الكبة غالباً مابتكون اكس لارج هيه كمانة..
بهاليوم بيطلع الرجال مهرولاً من بيتو بدون فطور او حتى فنجان قهوة..لانو هدير الماكينة بيثقب طبقة الاوزون ..مو بس طبلة الاذن..معلومكن المرحلة الاصعب بالتحضير هية مرحلة الطحن...
بدها نشاط مفرط ..وعزم جبار...وقوة حديدية....بتم الوحدة تكبس لحتى تنهد كتافها..وبعدا تعرك وتعجن لحتى تنحل مفاصلها...وتزيد هبرة ..وترش ملح..وتدوق وتدوق كل الحاضرات...وكل وحدة بتدلي برأيها..وتحكم..متل لجنة الاراب ايدل..
_حاجتها ملح
_ لازمها هبرة...
_ بدها دعك كتيررر...
بتستمع ست البيت لكل هالاراء وبتاخد بعين الاعتبار كل الاحكام والمشاورات.. وبتتوصل لقناعه انو تشتغل عكيفها وتختم الاجتماع بكلمة...حاجتها منيحة...
هون بتجي المرحلة الاسهل نوعاً ما..او فينا نسميها المثمرة..
حشي ...لف..تقطيع...رص بالصواني ..ودهن سمنة..وعلفيزر..
ويا ويلو وياسواد ليلو شي ولد يجي ويقاطع هالمرحلة الدقيقة والحساسة..لانو ساعتها ماحدا رح يرد عطلاباتو ونقو مهما كان مفصلي وهام.
بالكتير الكتير بيسدولو تمو بطقطوقة كبة لينة (طقطوقة: كلمة خاصة ومحروفة تستخدم فقط في يوم الكبة..وتعني قطعة من عجين الكبة)..
بياكل الولد الي في النصيب ..وهو سعيد ومنفرج الاسارير...وبينسى نقتو الاساسية وبيروح..
بتمضى الساعات..وبتتملى الصواني..ومنبلش نسمع سمفونية الالم التاسعة...اه كتافي...اخ ضهري...
بيخلص البرغل..تزمناً مع طنجرة الحشوة..وبيروحوا المساعدين..وهنن عم يتألموا..ويتنهدوا..وبتبلش ست البيت تنضف وتجهز الغدا المتأخر..الي هو طبعاً ....كبة....
بيدخل الرجال عالبيت جوعان..وسانن سنانو عأكلة كبة معتبرة...بيقعد عالسفرة الي بيكون فيها اشكال وانواع من الكبة..وصحن سلطة وعيران ومخلل..ومرتو عم تراقب بحذر وترصد حركة دخول قرص الكبة لتمو..حتى تعرف نتيجة تعبها بعد هاليوم العصيب...
لحظات هدوء قليلة..تتبعها صوت قرش وطحن..وبتتطلع النتيجة.......
ليش هيك الكبة ملحها قليل....؟!! ...
...
تركت لمخيلتكن الخصبة النهاية....
ودمتم برعاية الله ...
